Elordada QMDB qujattaryn nasıhattaý semınary ótti (FOTO)

Búgin Nur-Sultan qalasyndaǵy respýblıkalyq «Áziret Sultan» meshitinde Elorda ımamdaryna arnalǵan QMDB qujattaryn nasıhattaý semınary ótti. Qala bas ımamy Erbolat Júsipovtiń tóraǵalyǵymen ótken jıynǵa Elorda meshitteriniń ımamdary men jeti jumys baǵytyna jaýapty mamandar qatysty.

Jıyn barysynda Qazaqstan musylmandary dinı basqarmasynyń jumys baǵytyn aıqyndap, tyń serpin bergen kontseptýaldy qujattar taǵy bir talqylanyp, ishki erejeler men jumys tártibine tirek retinde paıdalaný usynyldy. Respýblıkalyq «Áziret Sultan» meshitiniń naıb ımamdary atalmysh qujattar jóninde arnaıy baıandama jasady.

Aıta keteıik, Qazaqstan musylmandary dinı basqarmasynyń uıytqy bolýymen ár jyldary uıymdastyrylǵan Imamdar forýmynda qazirgi ýaqytqa deıin 10 qujat qabyldanǵan bolatyn: «Qazaqstan musylmandarynyń tuǵyrnamasy», «QMDB qyzmetkeriniń Etıkasy», «Imamnyń tulǵalyq kelbeti», «Musylmannyń tulǵalyq beınesi», «Jeti rýhanı qazyq», «Dinı rásimder tizilimi», «Dinı laýazymdar tizilimi», «As berý mádenıeti», «Zırat jáne zııarat mádenıeti» jáne «Zııatker ımam» tujyrymdamasy.