Elordalyq ustazdar qaýymyna aýyzashar berildi (FOTO)
Keshe respýblıkalyq «Áziret Sultan» meshitindegi aýyzashar dastarhanyna Elordamyzdaǵy ustazdar qaýymy arnaıy shaqyrylyp, qurmetti qonaq boldy. El astanasyndaǵy bilim ordalaryn baǵytyn túzep, basshylyq etip kele jatqan mektep dırektorlary men ulaǵatty ustazdary Bas meshitte bas qosyp, qasıetti Ramazan aıynyń taǵylymyn sezinip qaıtty. Urpaq tárbıesine tikeleı jaýapty ustazdar qaýymyna kurmet kórsetilip, «Áziret Sultan» meshiti atynan syı-sııapat ta jasaldy.
Qurmetti mamandyq ıelerin qarsy alyp, «Berekeli Ramazan» dastarhanynyń tórine ornalastyrǵan soń «Áziret Sultan» meshitiniń qyzmetkeri Erkebulan Seıtjanuly qasıetti Ramazan jaıynda ýaǵyz aıtyp, otyrys taǵylymyn arttyra tústi. Alla razylyǵy úshin tańnyń atysy men kúnniń batysy iship-jemnen, nápsi qalaýlarynan tyıylyp, oraza ustaýdyń da túrli dárejeleri baryn kórkem túrde jetkize bilgen Erkebulan Seıtjanulynyń ýaǵyzy ustazdar qaýymyna erekshe áserin berdi. Ustaz uǵymyna laıyqtap, «ozat, ekpindi, nashar» oqýshylardyń deńgeıi syndy orazanyń da túrli dárejelerge bólinetinin aıtyp, qasıetti Ramazan aıynda tek qana as-sýdan ǵana tyıylmaı, kóz ben tildiń de orazasy bolatynyn kórkem dálelder arqyly jetkizdi.
Aıta keteıik, respýblıkalyq «Áziret Sultan» meshiti Ramazan aıy bastalǵaly beri kún saıyn 800 janǵa tegin aýyzashar berip keledi. QMDB tóraǵasynyń birinshi orynbasary, naıb múftı, «Áziret Sultan» meshitiniń bas ımamy Naýryzbaı qajy Taǵanulynyń bastamasymen osy dastarhan tórine Elordamyzdaǵy túrli qoǵamdyq uıym músheleri (zaǵıptar, qulaǵy estimeıtinder, qarttar úıi men balalar úıi, t.b.), ustazdar men dárigerler qaýymy, stýdentter men erikti jastar qozǵalysynyń ókilderi, t.b. qoǵam músheleri shaqyrylyp, arnaıy qonaq bolyp keledi.
