ELORDAMYZDYŃ EŃSESI BIIK BOLǴAI

Ardaqty aǵaıyn! Qadirli qala turǵyndary!

Sizderdi Astana qalasynyń 25 jyldyq mereıtoıymen shyn júrekten quttyqtaımyn. Otbasylaryńyzǵa amandyq, myqty densaýlyq, árbir ıgi isterińizge bereke tileımin.

Ózderińizge belgili, keshe Memleket basshysy Qasym-Jomart Toqaev «Astananyń 25 jyldyǵy. Jańa damý baǵyttary. Jańa múmkindikter» atty elordanyń baýyrlas qalalary forýmynyń saltanatty ashylý rásiminde elordamyz Táýelsiz Qazaqstannyń órkendeýine tyń serpin bergenin, jańarý men jańǵyrýǵa jol ashqanyn, bas qalamyzda kóptegen is-sharalar uıymdastyrylǵanyn, dinaralyq dıalog pen rýhanı dıplomatııanyń ordasyna aınalǵanyn atap ótti. Sondaı-aq Astanany birlik pen berekeniń besigi deýge tolyq negiz bar ekenin, bul qalada eń mańyzdy sheshimder qabyldanatynyn, bolashaqta da solaı bola beretinin jetkizdi.

Shyn máninde, elimizdiń damýynda Astana qalasynyń alar orny aıryqsha. Álemdik jáne dástúrli dinder lıderleri sezderiniń elordamyzda ótýiniń ózindik máni bar. Búginde bas qalamyz álem jurtyn birlik pen ıgilikke, dinı tatýlyq pen dostyqqa úndeıtin beıbitshiliktiń besigine aınaldy. Alla Taǵala súıikti qalamyzdyń qaryshtap damı berýin násip etkeı. Qala turǵyndary baqytty ǵumyr keship, arman-maqsattarymyzdyń oryndala berýin tileımin. Elimiz aman, jurtymyz tynysh, elordamyzdyń eńsesi bıik, táýelsizdigimiz baıandy bolsyn. Ámın!​

Naýryzbaı qajy TAǴANULY
QMDB Tóraǵasy, Bas múftı