EREJEP ​​– BEREKELI AI

Naýryzbaı qajy Taǵanuly,

QMDB Tóraǵasy, Bas múftı

Erejep – berekeli hám ulyq aı. Bul aıda ıgi amaldarǵa mol saýap jazylady, qulshylyqtar men duǵalar qabyl bolady. Alla Elshisi (oǵan Allanyń salaýaty men sálemi bolsyn): «Bes tún bar, onda duǵalar keri qaıtarylmaıdy. Olar – Erejep aıynyń alǵashqy túni, Shaǵban aıynyń jartysyndaǵy tún, Juma túni, Oraza jáne Qurban aıt túnderi», – degen.

Erejep (Rajab) – Alla Taǵalanyń soǵysýǵa, qan tógýge tyıym salǵan (Zulqaǵda, Zulhıjja, Muharram, Rajab) aılarynyń biri. «Rajab» sózi ulyqtaý, qurmetteý degen maǵynany bildiredi. 

Keıbir derekterde jer júzin sý basqanda Nuh paıǵambar kemege Erejep aıynyń birinshi kúni mingen, Muhammed paıǵambarǵa (oǵan Allanyń salaýaty men sálemi bolsyn) eń alǵashqy ýahı Erejep aıynda túsken, osy aıda Isra jáne Mıǵraj oqıǵasy bolǵan degen málimetter aıtylady. Taǵy bir derekte «Erejep – ol sýy sútten aq, baldan tátti jáne muzdan salqyn bir jumaq ózeniniń aty jáne bul móldir bulaqtan tek osy aıda oraza ustaǵandar ǵana ishedi» delingen. 

Paıǵambarymyz (oǵan Allanyń salaýaty men sálemi bolsyn)  Erejep aıynda oraza tutqan. Alaıda bul aıda oraza tutý nemese tutpaý – árkimniń óz erki. 

Islam dini kelmesten buryn Erejep aıynda qurban shalý rásimi bar edi. Islam kelip, onyń úkimin joıdy. Bir kisi Paıǵambarymyzǵa (oǵan Allanyń salaýaty men sálemi bolsyn) : «Biz jahılııatta (nadandyq dáýirde) Erejep aıynda (osy aıdyń qurmetine) qurban shalatyn edik. Endi bizge ne buıyrasyz?» – dedi. Paıǵambarymyz (oǵan Allanyń salaýaty men sálemi bolsyn): «Allanyń jolynda qaısy aıda bolsa da qurbandyqtaryńdy shala berińder. Alla úshin jaqsylyq jasańdar. Tamaqtandyryńdar», – dedi.

Sharıǵat boıynsha jaǵdaıy bar musylmanǵa Qurban aıt kúni qurban shalý – ýájip (mindet), al basqa ýaqyttarda ol nápil ǵıbadat bolyp esepteledi. 

Alla Elshisi (oǵan Allanyń salaýaty men sálemi bolsyn)  Erejep aıynda kóp ıstıǵfar aıtýǵa (keshirim tileýge) úndegen. Ardaqty Paıǵambarymyz Muhammed (oǵan Allanyń salaýaty men sálemi bolsyn) Erejep aıy bastalǵanda: «Ýa, Alla! Erejep jáne Shaǵban aılarynda bizge bereke ber, bizdi Ramazan aıyna jetkize gór!» – dep duǵa etken. 

Ǵalymdardyń biri: «Erejep – jelge, Shaǵban – bultqa, Ramazan jańbyrǵa uqsaıdy. Erejep aıynda dán egilmese, Shaǵban aıynda sýarylmasa, Ramazan aıynda odan qandaı egin kútýge bolady» degen eken. Sol sebepti, bul aıdy barynsha paıdaly ótkizip, ǵıbadat jasap, duǵa etip, arazdasqandar bir-birimen jarasyp, tatýlasý kerek. 

 Alla Taǵala barshamyzǵa Erejep aıynyń ıgiligi men berekesin násip etsin! Elimiz aman, jurtymyz tynysh, táýelsizdigimiz baıandy bolǵaı. Ámın!