Ǵulamalar keńesi el turǵyndaryn birlikke úndedi (FOTO)
Búgin elordada Bas múftı Naýryzbaı qajy Taǵanulynyń tóraǵalyǵymen QMDB Ǵulamalar keńesiniń kezekten tys HHHIII májilisi ótti. Májiliske Ǵulamalar keńesiniń Almaty qalasyndaǵy músheleri onlaın qatysty.
Májilis Almatydaǵy tártipsizdik kezinde sheıit bolǵan sarbazdarymyz ben beıbit turǵyndardyń rýhyna Quran baǵyshtaýmen bastaldy. Bas múftı Alla Taǵaladan elimiz bastan keshken qıyndyqty tezirek jeńildikke almastyryp, beıbit kúnimizdi baıandy etkeı dep duǵa etti.
«Halqymyz «Kóńil – kóńilden sý ishedi» degen. Elimizdegi qaıǵyly jaǵdaı turaqtylyq pen tynyshtyqtyń qadiri men mańyzyn meńzedi. Sanaly adamdar birlik degen uǵymnyń baǵa jetpes baılyq ekenin sezine tústi dep sanaımyn. Sondyqtan halyqty birlik pen ıgilikke úndep, eń áýeli yntymaqty ózimizden bastaýymyz kerek» degen Naýryzbaı qajy Taǵanuly eldegi ahýalǵa baılanysty atqarylýy tıis birqatar mindetterdi atap ótti.
Ǵulamalar keńesiniń músheleri qara jamylyp, qamkóńil kúı keship otyrǵan otbasylarǵa duǵa-tilegin arnap, qaıǵylaryna ortaq ekenin bildirip, halyqty birlik pen ıgilikke shaqyrdy.
Májilis barysynda sondaı-aq memleket múddesi úshin ıgi iste birigý, bolyp ótken jaǵdaılarǵa qatysty pátýalar shyǵarý, QMDB tarapynan atqarylýy tıis sharalar jaıly máseleler talqylandy.
