«Ǵylmanı» meshitinde donorlyq aktsııa ótti (FOTO)

«Sádýaqas qajy Ǵylmanı» meshiti Respýblıkalyq qan ortalyǵymen birlesip donorlyq aktsııasyn ótkizdi, dep habarlaıdy sunna.kz tilshisi.

Búginde donor tapshylyǵy kóptegen naýqastardy qıyndyqqa ushyratady. Qasıetti Quran Kárimniń «Máıda» súresinde naýqas janǵa qol ushyn sozyp, kómektesýdiń saýaby  «Kim ony tiriltse (ólimnen qutqarsa), barlyq adamdy tiriltkenmen teń» túsindiriledi. Qoǵamnyń muqtajdyǵyn eskergen meshit ujymy osy bir saýapty sharaǵa únemi at salysyp keledi.

Aldyn-ala jasalǵan nasıhat jumystarynyń nátıjesinde, búgin meshitke kelgen Qan ortalyǵy mamandaryna ótinish bildirgen qaıyrymdy jandardyń qatary az bolǵan joq. Meshit ujymy ózderi bastap qaıyrymdylyq sharasyna belsene kiristi.

Salaýatty ómir saltyn ustanýdy nazarda ustaǵan aktsııa aıasynda 60-qa jýyq  meshit jamaǵaty men qala turǵyndary qan tapsyryp, qaıyry mol iske atsalysty.