«ISLAM JÁNE ADAL QOǴAM» KITABYNA ǴALYMDAR MEN QOǴAM QAIRATKERLERI JOǴARY BAǴA BERDI
Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly hazrettiń «Islam jáne adal qoǵam» atty kitabynyń tanystyrylymynda memleket jáne qoǵam qaıratkerleri, belgili ǵalymdar sóz sóılep, eńbektiń rýhanı-aǵartýshylyq jáne qoǵamdyq mańyzyna joǵary baǵa berdi.
Alǵashqy bolyp sóz alǵan memleket jáne qoǵam qaıratkeri, professor, akademık Ǵarıfolla Esim kitapta kóterilgen máselelerdiń búgingi qoǵam úshin ózektiligine toqtaldy. Ǵalym adaldyq, ádildik pen jaýapkershilik uǵymdary jeke adamnyń ǵana emes, tutas qoǵamnyń rýhanı tiregi ekenin atap ótti. Sondaı-aq bul qundylyqtardy dinı jáne fılosofııalyq turǵydan sabaqtastyra qarastyrýdyń mańyzyn jetkizdi.
Ál-Farabı atyndaǵy Qazaq ulttyq ýnıversıtetiniń professory, tarıh ǵylymdarynyń doktory, QR UǴA akademıgi Bereket Káribaev eńbektiń tarıhı jáne rýhanı mazmunyna erekshe nazar aýdardy. Ǵalym ıslam qundylyqtarynyń qazaq halqynyń salt-dástúri men dúnıetanymymen sabaqtastyǵyn zerdeleýdiń mańyzyn atap ótip, ulttyq bolmysymyzdyń qalyptasýyna yqpal etken rýhanı murany keńinen nasıhattaý qajettigin aıtty.
Memleket jáne qoǵam qaıratkeri, Astana memlekettik qyzmet haby Basqarýshy komıtetiniń tóraǵasy Álıhan Baımenov kitapta qozǵalǵan máselelerdiń qazirgi qoǵam ómirimen tyǵyz baılanysty ekenin atap ótti. Sondaı-aq adaldyq pen jaýapkershilik jeke adamnyń boıyndaǵy izgi qasıetter ǵana emes, qoǵamdaǵy ózara senim men qoǵamdyq mádenıetti qalyptastyratyn mańyzdy qundylyqtar ekenine nazar aýdardy.
L.N. Gýmılev atyndaǵy Eýrazııa ulttyq ýnıversıtetiniń professory, fılologııa ǵylymdarynyń doktory Serik Negımov eńbektiń tili men mazmunyna toqtalyp, dinı-rýhanı uǵymdardyń oqyrmanǵa túsinikti ári utymdy jetkizilgenin atap ótti. Ǵalym kitaptyń adamgershilik qundylyqtardy dáripteýmen qatar, oqyrmandy izgilikke, kórkem minezge jáne adaldyqqa úndeıtin tárbıelik mańyzyn erekshe baǵalady.
Tanystyrylymda sóz sóılegen zııaly qaýym ókilderi «Islam jáne adal qoǵam» eńbeginiń qoǵamda adaldyq mádenıetin qalyptastyrýǵa, rýhanı qundylyqtardy nyǵaıtýǵa jáne óskeleń urpaq tárbıesine úles qosatynyna senim bildirdi.
