Islamdyq qarjy salasy mamandarynyń jıyny ótti (FOTO)
Búgin elordadaǵy Qazaqstan musylmandary dinı basqarmasy ǵımaratynda ıslamdyq qarjy salasy mamandarynyń basyn qosqan dóńgelek ústel ótti.
Alqaly jıynǵa QMDB Tóraǵasynyń orynbasary, naıb múftı Sansyzbaı Qurbanuly, Sharıǵat jáne pátýa bóliminiń mamandary Medet Qursaqov, Baýyrjan Abdýalıev, «Zeket jáne qaıyrymdylyq» qorynyń sharıǵı sarapshysy Maqsatbek Qaıyrǵalıev, Ulttyq Ekonomıka mınıstrligi Tabıǵı monopolııalardy retteý departamenti basshysynyń burynǵy orynbasary Nurlan Aıtpaev, sonymen qatar ıslamdyq qarjy naryǵynyń sarapshylary Quralaı Eldesbaı, Madına Tuqulova onlaın qatysty.
Basqosýda negizinen bırjada aktsııa satyp alý, satý, kelisimshart júıeleri, elimizdegi monopolııa týraly zań normalary talqylandy. Jıynda mamandar kóterilgen taqyryp boıynsha óz oıyn ortaǵa saldy. Dóńgelek ústel barysynda bırjadaǵy aktsııanyń fýnktsııalary tolyq aıqyndalyp, ónimniń qaı túrine monopolııa júretini saralandy.
Aıta keteıik, dál osy taqyryptyń sharıǵı úkimi aldaǵy ýaqytta QMDB Ǵulamalar keńesiniń kezekti májilisinde talqylanbaq.
