KENESARY HANNYŃ QURANY QAZAQSTAN MUSYLMANDARY DINI BASQARMASYNA TABYSTALDY (FOTO)

Búgin Prezıdenttiń tikeleı tapsyrmasy boıynsha Memlekettik keńesshi Erlan Qarın Qazaqstan musylmandary dinı basqarmasyna kelip, Kenesary hannyń Quranyn tabystady.

Memleket basshysy Túrkistanda ótken Ulttyq quryltaıdyń ekinshi otyrysynda áıgili Maral ıshannyń Kenesary hanǵa syılaǵan Quran kitaby tabylǵany jáne onyń elge oralǵany jaıynda málim etken bolatyn. Qasym-Jomart Toqaev óz sózinde Kenesary hannyń Qurany Qazaqstan musylmandary dinı basqarmasyna tabystalatynyn atap ótken edi.

Memlekettik keńesshi Qurandy otandyq jáne sheteldik joǵary bilikti, tájirıbeli mamandar tolyqtaı zerttegenin, biraýyzdan onyń Kenesary hanǵa tıesili ekenin anyqtaǵanyn aıtty. Sonymen qatar ol Qurannyń jan-jaqty sıpattamasyn baıandap, erekshelikterin jetkizdi.

Ǵalymdar Qurannyń bul nusqasy qazaq halqynyń tarıhı jádigeri ekenin rastap, onyń tarıhı jáne mýzeılik qundylyǵy óte joǵary dep baǵalap otyr.

Saltanatty rásimge qoǵam qaıratkerleri, zııaly qaýym ókilderi, Ulttyq quryltaıdyń músheleri men din qyzmetkerleri qatysty.

​