KEŃEITILGEN TÓRALQA MÁJILISI ÓTTI (FOTO)
Respýblıkalyq bas meshitte Bas múftı Naýryzbaı qajy Taǵanulynyń tóraǵalyǵymen Qazaqstan musylmandary dinı basqarmasynyń keńeıtilgen Tóralqa májilisi ótti. Oǵan QMDB basshylyq quramy men oblys-óńirlerdiń bas ımamdary qatysty.
Tóralqa májilisinde Naýryzbaı qajy Taǵanuly jyl basynda ýaǵyz-nasıhat, dinı ońaltý, sharıǵat jáne pátýa, dinı bilim jáne kadr daıarlaý, qoǵammen baılanys, ýaqyp qory, qajylyq, halal standarttaý, meshit isteri, aqparat, dinı kitaptar shyǵarý, din isteri jáne taldaý t.b baǵyttar boıynsha bekitilgen jumys josparynyń oryndalýyn pysyqtap, naqty tapsyrmalar berdi.
«Jyl basynda josparlanǵan jumystardyń óz ýaqytynda oryndalýyna nazar aýdaryńyzdar. Jyldyń aıaqtalýyna da az ýaqyt qaldy. Dinı basqarmanyń san-salaly baǵyttaǵy jumystaryn sapaly ári joǵary deńgeıde atqarýǵa kúsh salyńyzdar» dedi Naýryzbaı qajy Taǵanuly.
Tóralqa májilisiniń kún tártibine sáıkes meshitterge ataý berý boıynsha usynystar men ótinishter qaralyp, tıisti sheshim qabyldandy.
Jınalysta QMDB Dinı ońaltý bóliminiń meńgerýshisi Hasan Amanqul aımaqtardaǵy dinı ahýal jaıly baıandap, nazar aýdaratyn máselelerge toqtaldy. Bas múftı ımamdarǵa dinı ońaltý salasyndaǵy jumystarǵa jiti kóńil bólýdi tapsyrdy.
