Kentaý qalasynda qarılar daıarlaıtyn medrese ashyldy (FOTO)

Túrkistan oblysy, Kentaý qalasynda Allanyń kálámin nasıhattaıtyn «Balabı qarı» Quran jattaý ortalyǵynyń esigi qasıetti Juma kúninde jamaǵatqa aıqara ashty.

Jańa qarılyq ortalyqtyń ashylýyna Qazaqstan musylmandary dinı basqarmasy tóraǵasynyń birinshi orynbasary, naıb múftı, Túrkistan oblysy boıynsha ókil ımam Naýryzbaı qajy Taǵanuly, Túrkistan oblysynyń Qurmetti azamaty, aqyn, aqsaqal Rahym Balabıev, Kentaý qalasynyń ákimi Maqulbaev Ábdibaqyt Tillábaıuly, máslıhat depýtattary, qalanyń aqsaqaldary, medrese dırektorlary, ımam-moldalar, t.b. azamattar qatysty.

Ashylý saltanatyn Musa qarı Quran oqýmen bastasa, duǵasyn naıb múftı Naýryzbaı qajy Taǵanuly berdi.

Naıb múftı Naýryzbaı qajy Taǵanuly Bas múftı Serikbaı qajy Satybaldyuly hazrettiń ystyq sálemin jetkize otyryp, qarılyq ortalyq elimizge qaıyrly, eljandy balalardy tárbıeleıtin ortalyq bolýyna tilektestigin jetkizip, Bas múftıdiń arnaıy syılyǵyn tabys etti.

Kentaý qalasynyń ákimi Maqulbaev Ábdibaqyt Tillábaıuly bul medrese elimizdiń jastaryna durys joldy tabýyna, adaspaýyna qyzmet atqara berýine tilektestigin bildirdi.

Medreseniń salynýyna úles qosqan, aqyn, aqsaqal Rahym Balabıev kópshilikke bata berip, naıb múftı Naýryzbaı qajy Taǵanulyna qazaqy saltpen shapan japty. Medreseniń lentasyn qıyp, bilimmen ilimniń ordasy bolýǵa bata jasady.

Medrese 3 qabattan turady. Zamanaýı úlgimen salynǵan, óte yńǵaıly, barlyq kerek-jaraǵymen jabdyqtalǵan. Jalpy 80 balaǵa arnalǵan.