HÝSAMÝDDIN ÁS-SYǴANAQI ATYNDAǴY ISLAM INSTITÝTY AShYLDY (FOTO)
Búgin Nur-Sultan qalasynda Qazaqstan musylmandary dinı basqarmasyna qarasty Hýsamýddın ás-Syǵanaqı atyndaǵy ıslam ınstıtýty ashyldy. Oqý ornynyń ashylý saltanatyna Bas múftı Naýryzbaı qajy Taǵanuly qatysyp, ınstıtýt jumysyna sáttilik tiledi.
QMDB Tóraǵasy Qazaqstan musylmandary dinı basqarmasy bıyl jeti baǵyt boıynsha aıtaralyqtaı jumystar atqaryp kele jatqanyn, sonyń biri Dinı bilim jáne ǵylym baǵyty ekenin alǵa tartty.
«Dinı basqarmanyń negizgi jumys baǵyty sanalatyn bul sala boıynsha bıyl birqatar mańyzdy is-sharalar atqarýdy josparladyq. Jyl basyndaǵy baǵdarlyq baıandamamda elordadan arnaıy tereń dinı bilim beretin «Islam ortalyǵyn» ashýdy usynǵan bolatynmyn. Bul ortalyqtyń maqsaty – ımamdarǵa tereń bilim berý, klassıkalyq eńbekterdi oqytý, arab tilin jetik meńgerýine yqpal etý, dinı máselelerdi túsindirý qabiletin ashý. Sondaı-aq dinı bilim izdep shetelge ketetin jastardyń óz elimizde bilimin jetildirýine múmkindik beredi. Mine, búgin ózderińizdiń aldaryńyzda osy ınstıtýttyń ashylý saltanatyn ótkizip otyrmyz. Syǵanaq kóshesiniń boıynda ornalasqan Islam ınstıtýtyna elimizden shyqqan din ǵulamasy Hýsamýddın as-Syǵanaqı babamyzdyń esimi berilip otyr» dedi Naýryzbaı qajy Taǵanuly.
Sondaı-aq Bas múftı ınstıtýtta Nur-Múbarak ýnıversıtetin, QMDB-ǵa qarasty medrese-kolledjerdi támamdaǵan túlekter men ımamdar bilimin tereńdete alatynyn aıtty. Sonymen qatar jas qarılardy jigerlendirý maqsatynda ınstıtýt janynan Ijaza berý ortalyǵy ashylǵanyn atap ótti. «Birneshe baǵyttan turatyn Ijaza berý ortalyǵyn támamdaǵan shákirtter ıjaza kýáligine qol jetkizedi. Bul –tereń dinı bilim alam, Qurandy tolyq jattaımyn degen jas mamandardyń, bolashaq ǵalymdardyń rýhanı ári ǵylymı ortalyǵy bolady degen senimdemin» dedi QMDB Tóraǵasy.
Bas múftı saltanatty sharaǵa jıylǵan kópshilikke Hýsamýddın ás-Syǵanaqı atyndaǵy ıslam ınstıtýtynyń dırektory qyzmetine Baǵdat Manabaevtyń taǵaıyndalǵanyn habarlap, qyzmetine tabys tiledi. Saltanatty shara barysynda abaıtanýshy-ǵalym, professor Ǵarıfolla Esim, Nur-Múbarak ýnıversıtetiniń prorektory Qaırat Qurmanbaev, Aqparat jáne qoǵamdyq damý mınıstrligi Din isteri komıtetiniń tóraǵasy Erjan Núkejanov quttyqtaý sóz sóılep, jyly lebizin bildirdi.
