«KITAPTARDY DINI SARAPTAMADAN ÓTKIZÝ QAǴIDATTARY» TAQYRYBYNDA SEMINAR ÓTTI
Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly bekitken bes baǵyt boıynsha jumys josparyna sáıkes Ortalyq apparattyń májilis zalynda «Kitaptardy dinı saraptamadan ótkizý qaǵıdattary» taqyrybynda onlaın semınar ótti.
Semınarǵa naıb múftı, Sharıǵat jáne pátýa bóliminiń meńgerýshisi Sansyzbaı Qurbanuly, Aqparat jáne qoǵamdyq damý mınıstrligi Din isteri komıtetine qarasty Dintaný saraptamasy basqarmasynyń basshysy Nurǵalı Qabylov, QMDB Apparat basshysy Ǵylymbek Májıev, Dinı saraptama bóliminiń meńgerýshisi Nurlan Qaırbekov jáne elimizdiń Astana, Almaty, Shymkent qalalary jáne barlyq oblystarynan dinı saraptama mamandary qatysty.
Eki saǵatqa sozylǵan jıynda Qazaqstanda basylyp jatqan dinı ádebıetterdiń júıeli saraptamadan ótkizý máseleleri talqylandy. Alǵashqy bolyp sóz alǵan Sansyzbaı Qurbanuly Bas múftı Naýryzbaı qajy Taǵanulynyń Dinı saraptama jumystaryna zor senim artqandyǵyn jetkizip, dinı ádebıetterdiń jiti tekserilýi qajettigin atap ótti.
«Dinı ádebıetterdiń arasynda jat aǵymǵa nasıhat jasaıtyn eńbekter kezdesip jatady. Otan ishinen otaý tigetinderdiń mundaı áreketteri memleket ishinde búlik týdyrýdy kózdeıtindigin anyq bildirse kerek. Sol sebepti, Qazaqstanda basylyp jatqan árbir dinı kitapqa kásibı sarapshylar qorytyndysynyń qajet ekendigi anyq» dedi naıb múftı.
Dintaný saraptamasy basqarmasynyń basshysy Nurǵalı Berdikuly ózi basshylyq etip otyrǵan sarapshylar basqarmasynyń jumysymen tanystyra otyryp, kitaptardy súzgiden ótkizýdiń ózindik prıntsıpterin bólisti. Onyń aıtýynsha, avtor men sarapshylar tobynyń jumysyn jeńildetý úshin arnaıy Elektrondyq júıe oılastyrylǵan. Nátıjesinde, dinı saraptaýdy qajet etetin árbir kitapqa nebári 22 jumys kúniniń ishinde qorytyndy beriletin kórinedi.
«Egemendigimizdi enshilegen jyldary basqarmaǵa kelip túsken dinı eńbekterdiń 20-30 paıyzǵa jýyǵy teris qorytyndyǵa ıe bolatyn. Al búginde Aqparat jáne qoǵamdyq damý mınıstrligi Din isteri komıteti men Qazaqstan musylmandary dinı basqarmasynyń kóp jyldyq nasıhat jumystarynyń nátıjesinde bul kórsetkish 6-7 paıyzǵa deıin kemip otyr» dep jemisti eńbekterdiń qorytyndysyn atap ótti.
Jıyn barysynda QMDB Apparat basshysy Ǵylymbek Jádigeruly Din isteri komıtetinen kelgen arnaıy qonaqqa alǵysyn bildirip, Dinı saraptaý máselelerine baılanysty tushymdy oılaryn jetkizdi.
«Biz elimizdegi basylyp jatqan árbir dinı ádebıetke muqııat bolýymyz qajet. Meshit kitaphanalarynda, úlken zaldaǵy sórelerinde, dinı dúkenderde, medreselerde, saýat ashý ortalyqtarynda, qala berdi namazhanalarda qoıylyp jáne satylyp júrgen dinı kitaptardyń barlyǵy Din isteri komıteti Dintaný saraptamasynyń jáne QMDB Saraptaý komıssııasynyń oń qorytyndysyn alǵan bolýy shart. Eger oń qorytyndy bolmaǵan jaǵdaıda, mundaı kitaptar shuǵyl túrde Dinı saraptama komıssııasynan ótýi tıis» dedi Apparat basshysy.
Al is-sharany uıymdastyrýǵa muryndyq bolǵan Dinı saraptama bóliminiń basshysy Nurlan Evfratuly bólimniń osy ýaqytqa deıin atqarǵan sharýalaryna kóz júgirtip, dinı saraptama jumystarynyń tolyqqandy qalaı júzege asatynyn túsindirdi.
«Tek 2023 jyldyń basynan beri bas aıaǵy 80-ge jýyq dinı ádebıet Dinı saraptamadan ótse, onyń ishinde tek eki kitapqa ǵana oń qorytyndy berilmedi. Al jeti kitap QMDB janynan qurylǵan «Ǵulamalar tobynyń» arnaıy qorytyndysyn qajet etip otyr» dep maýsymdyq jumys qorytyndysyn baıandaǵan bólim meńgerýshisi Hanafı mázhabynyń klassıkalyq eńbekterimen, «MUFTIYAT» baspasynan shyqqan kitaptar jáne QMDB Saraptaý komıssııasynan ótken, ıaǵnı ruqsat etilgen jáne ruqsat etilmegen kitaptarmen tanystyrdy.
Onlaın semınar sońynda óńirlerdegi saraptama mamandary da kókeılerinde júrgen suraqtarǵa qanaǵattanarlyq jaýap alyp, kókeıtesti máselelerdi talqylaýdan qalys qalmady.
