Malaızııalyq delegat Bas múftımen kezdesti (FOTO)
Álemge áıgili xalal standarttaý jáne sertıfıkattaýmen aınalysatyn «Malaızııadaǵy ıslamdy damytý departamenti» JAKIM uıymynyń aýdıt mamandary – Joharı Bın Áb Latıf, Luqman Nul Hakım Bın Samad Astanada Bas múftı Serikbaı qajy Orazben kezdesti.
Kezdesýde halal standarttaý, osy sala boıynsha halyqaralyq zerthanalar jumysy, Qazaqstandaǵy halal standarttaý salasynyń búgini men bolashaǵy, áriptestik qarym-qatynasty kúsheıtý, t.b. máseleler talqylandy.
QMDB tóraǵasy Serikbaı Satybaldyuly halyqtyń halal ónim, halal qyzmet týraly túsinigi men mádenıetin qalyptastyrý baǵytynda birlisken is-sharalardy júzege asyrýdy usyndy. Óz kezeginde malaızııalyq mamandar bul usynysqa qoldaý bildirip, áriptestik baılanys úshin árdaıym daıyn ekenin jetkizdi.
Kezdesý sońynda Bas múftı «Uly dala tósindegi Islam» atty avtorlyq kitabyn meımandarǵa syılady.
Aıta keteıik, 2017 jyly mamyr aıynda QMDB-ǵa qarasty «Halal Damy» JShS Malaızııadaǵy ataqty JAKIM júıesinde akkredıtteýden ótý úshin qajetti qujattar tapsyrǵan bolatyn. Nátıjesinde aǵymdaǵy jyldyń 2-8 qyrkúıek aralyǵynda JAKIM uıymynyń mamandary elimizge arnaıy keldi. Basty maqsat – halal standarttaý jáne sertıfıkattaýmen aınalysatyn «Halal Damý» uıymynyń jumysyn baqylaý, tıisti baǵasyn berý jáne akkredıtteýden ótkizý.
«Malaızııadaǵy ıslamdy damytý departamenti» JAKIM – ıslamdyq mindettemelerdi oryndaýǵa, Malaızııadaǵy halal standarttaý jáne sertıfıkattaý júıesine jaýapty uıym. Qazirgi tańda atalmysh uıym álem boıynsha 69 sertıfıkattaý organyn akkredıtteýden ótkizgen.
Eger «Halal Damý» JShS bul uıymnyń akkredıtteýinen ótse, halal sertıfıkatyna ıe bolǵan otandyq kásiporyn ónimderin álemniń 41 eline eshqandaı kedergisiz Eksport jasaýyna múmkindik beriledi. Atap aıtqanda, Germanııa, Úndistan, Indonezııa, Iran, Irlandııa, Italııa, Japonııa, Kenııa, Marokko, Nıderlandy/Gollandııa, Jańa Zelandııa, Pákistan, Fılıppın, Polsha, Sıngapýr, Ońtústik Afrıka, Ońtústik Koreıa, Ispanııa, Shrı-Lanka, Shveıtsarııa, Taıvan, Taıland, Túrkııa, Birikken Arab Ámirlikteri (BAÁ), Ulybrıtanııa, Amerıka Qurama Shtattary (AQSh), Vetnam memleketterine ónim shyǵarýǵa múmkindik bar.
