MARAL IShANNYŃ KENESARY HANǴA SYILAǴAN QURANY KESENEGE QOIYLDY (FOTO)
Búgin Túrkistan qalasynda áıgili Maral ıshannyń Kenesary hanǵa syılaǵan Quran kitabyn Qoja Ahmet Iasaýı kesenesine qoıý rásimi ótti.
Saltanatty is-sharaǵa QMDB Tóraǵasy, Bas múftı Naýryzbaı qajy Taǵanuly, Túrkistan oblysynyń ákimi Darhan Satybaldy, Din isteri komıtetiniń tóraǵasy Erjan Núkejanov, sondaı-aq Kenesary han men Maral ıshan urpaqtary qatysty. Rásim Quran oqýmen bastalyp, oblys ákiminiń quttyqtaýymen jalǵasty. Aımaq basshysy mundaı jıynnyń ótýi mártebe deı kele, túrki jurtynyń tórine balanǵan Túrkistan úshin taǵylym ekenin atap ótti.
Al Bas múftı Naýryzbaı qajy Taǵanuly óz kezeginde bul Memleket basshysy Qasym-Jomart Kemelulynyń úlken amanaty ekenin aıtyp, er túriktiń besigine balanǵan Túrkistan úshin tarıhı oqıǵa dedi.
«Osy jyldyń maýsym aıynda babamyzdan jetken qundy jádigerdi Qazaqstan musylmandary dinı basqarmasy qabyldap alyp, búgin sol bir babalarymyzdyń kózi bolǵan qundy mura jeti ǵasyrlyq tarıhy bar Qoja Ahmet Iasaýı kesenesine qoıylǵaly tur. Jańa ǵana qarılarymyz Quran Hatym túsirip, saýabyn Kenesary han men Maral ıshan syndy barsha babalarymyzǵa baǵyshtadyq. Alla qabyl etsin!
Qadirli Qasym-Jomart Kemelulynyń bizge senim artyp tapsyrǵan amanaty búgin kıeli Túrkistan tórine jetti. Qundy jádigerdiń Qoja Ahmet Iasaýı babamyzdyń kesenesine qoıylýy dástúrli dinimizdiń mártebesiniń artyp, halqymyzdyń sanasynyń izgilikke ózgerýine yqpal etedi degen oıdamyz. Qundy muramen elimizge qut ornasyn» QMDB Tóraǵasy.
Sondaı aq jıynda sóz alǵan Erjan Bolatqanuly da jádigerdiń Túrkistanǵa qoıylýy máni bar mańyzdy dúnıe dep atap ótti. Resmı is-shara barysynda Bas múftı Qurandy «Áziret Sultan» qoryq-murajaıynyń dırektory Jeńisbek Máýlenqulovqa tabystap, kitap kesenedegi úlken «Aqsaraı» bólmesine qoıyldy.
Derekkóz: QMDB Baspasóz qazmeti
