MAROKKO KOROLDIGINIŃ ÓKILI – DINI BASQARMADA (FOTO)
Marokko Koroldiginiń Syrtqy ister, afrıkalyq yntymaqtastyq jáne shetelde turatyn marokkolyqtyr jónindegi mınıstrliktiń Azııa jáne Okeanııa isteri jónindegi departamentiniń dırektory Abdelqader ál-Ansarı Qazaqstanǵa resmı jumys sapary aıasynda Dinı basqarmaǵa arnaıy keldi.
Mártebeli meıman QMDB Tóraǵasynyń orynbasary, naıb múftı Ershat Ońǵarmen kezdesip, suhbattasty. Kezdesýde eki eldiń dostyq qarym-qatynasy sóz boldy. Naıb múftı Qazaqstan musylmandary dinı basqarmasynyń jumysy jaıly baıandap berdi.
Óz kezeginde Abdelqader ál-Ansarı Dinı basqarmanyń dinı saladaǵy orny men róli jaıly oıymen bólisip, ıgi bastamalarǵa tileýlestik nıetin bildirdi. Kezdesý sońynda taraptar ortaq jobalardy júzege asyrýǵa kelisti.
Sondaı-aq kezdesýge Marokko Koroldiginiń elimizdegi Tótenshe jáne Ókiletti elshisi Mohammed Rashıd Maanıný men QMDB Apparat basshysy Ǵylymbek Jádigeruly qatysty.
