MÁÝLIT AIY QUTTY BOLSYN!
Naýryzbaı qajy TAǴANULY,
QMDB Tóraǵasy, Bas múftı
Qurmetti jamaǵat!
Barshańyzdy ardaqty Paıǵambarymyz Muhammedtiń (oǵan Allanyń salaýaty men sálemi bolsyn) dúnıege kelgen qasıetti Máýlit aıynyń kelýimen shyn júrekten quttyqtaımyn! Ár shańyraqqa amandyq pen shattyq, bereke men birlik tileımin. Alla Taǵala barshamyzdy Óziniń shynaıy quly, súıikti Elshisiniń (oǵan Allanyń salaýaty men sálemi bolsyn) laıyqty úmbeti etsin!
Máýlit aıy – Paıǵambarymyzdyń ónegeli ómirin nasıhattap, súnnet amaldaryn dáripteýdiń, dinimizdiń asyl qundylyqtaryn ulyqtaýdyń berekeli múmkindigi. Bul aıda meshitterde Allaǵa madaq aıtylyp, Paıǵambarymyzǵa salaýat joldanady, máýlit jyry oqylady.
Alla Taǵala Quranda: «Rasynda, Alla jáne Onyń perishteleri Paıǵambarǵa salaýat aıtady. Ýa, ıman keltirgender! Sender de oǵan salaýat aıtyp, sálem joldańdar» («Ahzab» súresi, 56-aıat) dep buıyrǵan. Al Paıǵambarymyz (oǵan Allanyń salaýaty men sálemi bolsyn): «Kim maǵan bir salaýat aıtsa, Alla oǵan on salaýat aıtady» degen. Taǵy bir hadıste: «Kim maǵan bir salaýat aıtsa, oǵan Alla on salaýat aıtady, onyń on kúnásin keshiredi ári dárejesin on esege kóteredi» dep súıinshilegen.
Demek, salaýat aıtý – ózimiz úshin qaıyrly ári mol saýapqa jeteleıtin izgi amal. Sondaı-aq Paıǵambarymyzdyń súnnetin ustaný – Allanyń razylyǵyna jaqyndatar joldyń biri.
Alla Taǵala barshamyzǵa ónegeli ómir súrip, urpaǵymyzǵa úlgi bolýdy násip etsin! Máýlit aıy múbárak bolsyn! Áýmın!
Источник: Aidos
