Medrese shákirtteri arasynda Quran jarysy ótti (FOTO)
Elordadaǵy «Astana» medrese-kolledjinde el Táýelsizdiginiń 30 jyldyǵyna arnalǵan II respýblıkalyq medresearalyq Quran Kárim jarysy ótti.
Jarys «Astana» medrese-kolledjiniń túlegi, «Áziret Sultan» meshitiniń azanshysy Erbolat Shaýdyrbaıdyń Qasıetti Quran aıattaryn oqýymen bastalsa, keıin 9 medreseden kelgen 20 shákirt ózara baq synasty.
«Qaýam Ad-dın ál-Itqanı ál-Farabı át-Túrkistanı» respýblıkalyq qarılar daıyndaý ortalyǵynyń dırektory Sádýaqas qarı Oljabaıuly, respýblıkalyq «Áziret Sultan» meshitiniń naıb ımamy Jumanazar qarı Óserhanuly men ustaz Murtaza qarı Ergenuly jarysqa qatysýshy úmitkerlerdiń Quran oqý barysynda jibergen qatelikterin saralap, óz baǵasyn berdi.
Jarys nátıjesine kelsek, 2 para boıynsha «Astana» medresesiniń shákirti Shoqtaı Edil 1-oryndy jeńip alsa, Almaty oblysy «Úshqońyr» medresesiniń shákirti Qurmanáli Nurıman 2-orynǵa ıe boldy. Al Almaty qalasy «Ábý Hanıfa» medresesiniń shákirti Jeńisuly Kenjebek 3-oryndy qanaǵat tutty.
Sondaı-aq 5 para boıynsha baq synaǵan «Aqtóbe» medresesiniń shákirti Raýshan Habıbolla bas júldeni jeńip alyp, QMDB Tóraǵasy Naýryzbaı qajy Taǵanuly taǵaıyndaǵan Umra qajylyǵyna joldama alsa, «Ábý Hanıfa» medresesiniń shákirti Dinasyl Qarajanov 1-oryn ıelenip, ol da Umra qajylyǵyna joldama aldy. Túrkistan oblysyndaǵy «Saryaǵash» medresesiniń namysyn qorǵaǵan Ábdýalı Beısenálıev 2-orynnan kórinse, «Úshqońyr» medresesiniń shákirti Nurym Basbolat 3-oryndy ıelendi.
Jeńimpazdar men júldegerlerdi QMDB Apparat basshysy Ǵylymbek Jádigeruly, Dinı bilim jáne kadr daıarlaý bóliminiń meńgerýshisi Smaıyl Seıtbekov, Nur-Sultan qalasy men respýblıkalyq «Áziret Sultan» meshitiniń bas ımamy Erbolat Júsipov, «Astana» medresesiniń dırektory Baqtybaı Qydyrbaıuly, sondaı-aq qatysýshylardyń Quran oqý mánerin baǵalaǵan qazylar qarjylaı syılyqpen marapattady.
