Mektep túlekteri meshitke kelip, úlkenderdiń aq batasyn aldy (FOTO)
Búgin Astana qalasyndaǵy respýblıkalyq «Áziret Sultan» meshitinde mektep bitirýshilerge arnalǵan «Jolyń bolsyn, jas túlek!» atty shara bolyp ótti. On bir jyldyq oqý baǵdarlamasyn oıdaǵydaı aıaqtap, úlken ómirge qanat qaqqaly otyrǵan jas túlekter alǵashqy qadamdaryn Alla úıinen bastap, ıgi jaqsylardyń aq batasymen qýattanyp qaıtty. Bıylǵy jyly qasıetti Ramazan aıyna tuspa-tus kelgen ataýly kúnniń aıryqsha ótýine mán bergen «Áziret Sultan» meshiti jas túlekterge qajetti keńes-tilekter jazylǵan arnaıy paraqsha taratyp, jastar júregine ımandylyq nuryn jetkizýge jol saldy.
Mektep qabyrǵasynan túlep ushyp, bilim aıdynyna bet alǵan túlekterge aq tilegin arnap, atalyq batasyn berýge kelgen «Ardagerler uıymy» respýblıkalyq qoǵamdyq birlestiginiń tóraǵa orynbasary Ómirzaq Ozǵanbaıuly shara shymyldyǵyn ashyp, óziniń ómirlik tájirıbesimen bólise ketti. Sanaly ǵumyrynyń 59 jylyn ustazdyqqa arnaǵan ardager aqsaqal jas túlekterge oı salarlyq oqıǵalardan mysal keltire ótip, egemen elimizdiń erteńi ertegideı ádemi bolýyn jas túlekter moınyna amanattady.
On bir jyl boıy bilim nárimen sýsyndatqan aıaýly ustazdarynyń aıaly alaqanynan túlep ushyp, synaǵy men syny kóp úlken ómirge júreksine attaǵaly otyrǵan jas túlekterge QMDB tóraǵasynyń birinshi orynbasary, naıb múftı, «Áziret Sultan» meshitiniń bas ımamy Naýryzbaı qajy Taǵanulynyń júrekjardy lebizi erekshe jiger berip, boılaryndaǵy beımálim úreı men qorqynyshty sypyryp tastaǵandaı boldy. Ardaqty Alla Elshisiniń (s.ǵ.s.) ósıetterinen ónege úıretip, bilim jolyndaǵy izdenistiń izgiligi jóninde oı tolǵaǵan Naýryzbaı qajy Taǵanuly túlekterge aqjol tilep, aq batasyn arnady. Alda kele jatqan UBT naýqanyn sátti tapsyryp, elimizdiń abyroı asqaqtatar azamat bolyp qalyptasýlaryna senim bildirdi. Sondaı-aq, sátsizdikter men synaqtarǵa moıymaı, qandaı qıyndyq bolsa da qasqaıyp qarsy alýǵa shaqyrdy.
Jas túlekterge arnalǵan sharaǵa Astana qalasy qoǵamdyq damý isteri basqarma basshysy Danııar Esın myrza da arnaıy kelip, aǵalyq aq tilegin joldady. Elbasymyzdyń «Elimizdiń erteńgi taǵdyry bilimdi jastardyń qolynda» degen qanatty sózin qaperge salyp, bilim jolyndaǵy kelesi baspaldaqty sátti bastaýlaryn tiledi.
Altyn uıa – aıaýly mektepterin artqa qaldyryp, ómir aıdynyna bet túzegen jas túlekter osylaısha búgingi sharadan bolashaqqa qýat alyp, elimizdiń Bas meshitinen rýhanı nárlenip qaıtty. Alda alǵashqy asý – Ulttyq biryńǵaı testileý naýqany. Olaı bolsa, jolyń bolsyn, jas túlek!
