MEMLEKET BASShYSY IMAMDAR FORÝMYNA QUTTYQTAÝ HAT JOLDADY (FOTO)

Búgin Astana qalasynda Qazaqstan musylmandary dinı basqarmasynyń uıymdastyrýymen «Imam – izgi qoǵam jarshysy» taqyrybynda bastalǵan V respýblıkalyq ımamdar forýmyna Memleket basshysy Qasym-Jomart Kemeluly arnaıy quttyqtaý hatyn joldady. Prezıdentttiń quttyqtaý hatyn Qazaqstan Respýblıkasynyń Memlekettik keńesshisi Erlan Qarın oqyp berdi.

 «Qadirli qaýym! Ardaqty aǵaıyn! Barshańyzdy «Imam – izgi qoǵam jarshysy» atty ımamdardyń V respýblıkalyq forýmynyń bastalýymen shyn júrekten quttyqtaımyn!

Islam – rýhanııatymyzdyń tiregi. Ata dinimiz izgilik pen adamgershilikke, janashyrlyq pen jasampazdyqqa negizdelgen. Osyndaı asyl qundylyqtar qoǵamda turaqtylyq pen tatýlyqty nyǵaıtyp, elimizdi órkendetý isinde aıryqsha ról atqarady. Sondyqtan salt-dástúrimizben tyǵyz sabaqtasqan dástúrli ıslamdy qadirleý óte mańyzdy.

Adamzat órkenıeti ǵylym men tehnologııanyń damýymen ǵana shektelmeıdi. Ult sapasyn jaqsartamyz desek, rýhanııat salasyna basa mán berýimiz kerek. Múftııat el taǵdyryna aıryqsha yqpal etetin osy jaýapty jumysqa belsene atsalysyp keledi. Imamdarymyz halyqtyń dinı saýatyn arttyrýǵa, óskeleń urpaqqa ónegeli tárbıe berýge jáne ony jat aǵymdardyń áserinen qorǵaýǵa óz úlesin qosýda.

Osy oraıda Qazaqstan musylmandary dinı basqarmasyna jáne barsha din qyzmetkerlerine shynaıy rızashylyǵymdy bildiremin. Búgingi basqosýda ımamdardyń bedelin kúsheıtýge, ata dinimizdiń qoǵamdaǵy róline qatysty mańyzdy oı-pikirler aıtylady dep senemin.

Sizderge zor densaýlyq, baq-bereke tileımin! Forýmnyń jumysy tabysty bolsyn!» delingen Memleket basshysynyń quttyqtaý hatynda.