Elorda meshitteriniń shákirtteri arasynda Voleıbol týrnıri ótti (FOTO)

Keshe Elorda meshitterindegi Dinı saýat ashý kýrstarynda tálim alatyn shákirtter arasynda Voleıbol týrnıri bolyp ótti. Salaýatty ómir saltyn nasıhattap, meshit shákirtteriniń bir-birimen etene aralasýy maqsatynda uıymdastyrylǵan sporttyq saıysqa Astana qalasyndaǵy 10 meshit shákirtteri jáne «Astana» medrese-kolledji men «Nur Astana» meshitiniń Dinı saýat ashý ortalyǵynyń shákirtterinen jasaqtalǵan 12 komanda qatysyp, ózara baq synasty.

Tartysty ótken týrnır barysyn tamashalaýǵa QMDB tóraǵasynyń birinshi orynbasary, naıb múftı, Astana qalasynyń Bas ımamy Naýryzbaı qajy Taǵanuly, Din problemalaryn zertteý ortalyǵynyń basshysy Jabal Erǵalıev, meshit ımamdary men jamaǵaty arnaıy qatysyp, shákirtterdiń sheberlikterine kýá boldy. Dúbirli dodanyń ashylý saltanatynda sóz sóılegen naıb múftı Naýryzbaı qajy Taǵanuly urpaq saýlyǵy – ult bolashaǵy ekenin atap ótip, Astana qalasy ókildiginiń mundaı sporttyq sharalardy kóptep uıymdastyrýǵa qatty kóńil bóletinin jetkizdi. Jarysqa qatysýshylarǵa sáttilik tilep, izgi tilegin arnady.

Tartysqa toly ótken týrnırdiń bas júldesin «Ǵylmanı» meshitiniń «Saryarqa» komandasy enshilep, 50 000 teńgeniń sertıfıkatyn ıemdendi. Al, júlde qory 30 000 teńgeni quraıtyn II-orynǵa «Áljan Ana» meshitiniń komandasy turaqtasa, júldeli III-oryn (20 000 teńge) «Nur Astana» meshitiniń Dinı saýat ashý ortalyǵyna buıyrdy. Jeńimpaz komandalarǵa arnaıy kýbok tabystalyp, Astana ókildigi atynan dıplomdar tabystaldy.

Sýretterdi «FOTOGALEREIa» aıdarynan kóre alasyzdar!