MEShITTERDE ShAHTADAǴY QAIǴYLY JAǴDAIǴA BAILANYSTY DUǴA JASALDY (FOTO)

Búgin Qazaqstan musylmandary dinı basqarmasynyń tóraǵasy Naýryzbaı qajy Taǵanulynyń bastamasymen elimizdiń meshitterinde Qaraǵandy oblysyndaǵy qaıǵyly jaǵdaıǵa baılanysty duǵa jasaldy.

Elordadaǵy «Áziret Sultan» meshitinde quptan namazynan keıin arnaıy Quran aıattary oqylyp, Bas múftı arnaıy duǵa jasady.

«Ýa, Alla Taǵala! Shahtadaǵy jarylystan qaza tapqan baýyrlarymyzdy raqymyńa bóleı gór. Olardyń otbasylaryna, jaqyndaryna, perzentterine kórkem sabyr, qıyndyqtaryna jeńildik ber. Elimizdi, jerimizdi túrli jamandyqtan, aýyrtpashylyqtan óziń qorǵaı gór» dedi QMDB Tóraǵasy.

Aıta keteıik, atalmysh qaıǵyly jaǵdaıǵa baılanysty Memleket basshysy Qasym-Jomart Toqaevtyń jarlyǵymen erteń, 29 qazan – elimizde jalpyulttyq aza tutý kúni bolyp jarııalandy.

​

Derekkóz: QMDB Baspasóz qyzmeti