MEIIRIMGE TOLY MEREKE
Naýryzbaı qajy TAǴANULY,
Qazaqstan musylmandary dinı basqarmasynyń tóraǵasy, Bas múftı
1 maýsym – Halyqaralyq balalardy qorǵaý kúni – meıirimge toly mereke. Sebebi balanyń qýanǵanynan, onyń shat kúlkisinen artyq eshteńe joq. Biz úshin balalarymyzdyń bolashaǵy mańyzdy. Óıtkeni olar – erteńgi el tizginin ustaıtyn naǵyz kemel urpaq. Sondyqtan olarǵa sapaly bilim, jaqsy tárbıe berý – bizge mindet.
Biz «Áke balasyna jaqsy tárbıeden artyq mıras qaldyra almaıdy» degen Paıǵambar (oǵan Allanyń salaýaty men sálemi bolsyn) sózin kókeıine myqtap túıgen, «El bolam deseń, besigińdi túze» degen ustanymǵa myqtap bekingen halyqpyz.
Babalarymyz burynnan Qudaıdan qorqatyn perzent tárbıelep, balaǵa eń aldymen ımandylyq tárbıesin sińirýdi kózdegen. Sebebi Allany tanyǵan, Qudaıdan qorqatyn perzent eshýaqytta ata-anasyna qarsy kelmeıdi, qoǵamǵa keri áserin tıgizbeıdi. Kerisinshe zerek, alǵyr bolyp ósip, ata-anasyn eki dúnıe jaqsylyǵymen qýantyp, hákim Abaı aıtqandaı, kirpish dúnıedegi ketigin taýyp qalanyp, qoǵamda orny bar óz isiniń mamany ekenin dáleldeıdi.
Ardaqty Paıǵambarymyz (oǵan Allanyń salaýaty men sálemi bolsyn): «Balanyń ákesindegi quqyqtarynyń biri – jaqsy ádep pen jaqsy esim», – degen. Osy súnnetti berik ustanǵan babalarymyz perzentine jaqsy esim qoıyp, jaqsy tárbıe berýge tyrysqan. Sebebi balaǵa jas kezinde berilgen tárbıe jas shybyqty ıgenmen birdeı.
Paıǵambarymyz (oǵan Allanyń salaýaty men sálemi bolsyn) taǵy bir hadısinde: «Adam dúnıeden ótkende onyń úsh nársesinen – toqtaýsyz sadaqasy, taratqan bilimi jáne salıqaly urpaǵynyń duǵasynan basqa barlyq amaly toqtaıdy», – degen bolatyn. Demek salıqaly urpaq ósirý – saýaby mol salıqaly is. Ondaı urpaq ata-anasynyń júzin jerge qaratpaıdy, perzenttik boryshyn adal atqaryp, tipti ata-anasy dúnıeden ótse de olar úshin únemi duǵa etip, jaqsy amaldary arqyly saýaptyń úzilmeýine sebepker bolady.
«Uıada ne kórse, ushqanda sony iler» deıdi babalarymyz. Endeshe, ulttyń bolashaǵyn oılasaq, urpaq tárbıesin umytpaǵanymyz abzal! Balalarymyz baqytty bolsyn!
