MINISTR MEN BAS MÚFTI DÓŃGELEK ÚSTELGE QATYSTY (FOTO)
Búgin Túrkistan qalasynda Aqparat jáne qoǵamdyq damý mınıstri Darhan Qydyráli, QR Bala quqyqtary jónindegi ýákili Dınara Zakıeva, Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly, Túrkistan oblysynyń ákimi Darhan Satybaldy men qoǵamdyq uıymdar, ortalyq jáne jergilikti atqarýshy organ, quqyq qorǵaý organdary, men úkimettik emes uıymdardyń qatysýymen «Qazaqstandaǵy balalarǵa qatysty zorlyq-zombylyqtyń aldyn-alý» taqyrybynda dóńgelek ústel ótti.
Basqosýda QMDB Tóraǵasy Naýryzbaı qajy Taǵanuly moderator boldy. Al jıynda alǵash bolyp urpaq tárbıesi jóninde baıandama jasaǵan mınıstr Darhan Qýandyquly:
«Búgingi alqaly jıynnyń Túrkistan topyraǵynda ótýiniń ózindik sımvoldyq máni bar. Bul óńir – uly dala órkenıetiniń besigi, tamyry tereń tarıhymyzdyń, berik dástúrimizdiń qasıetti ordasy. Memleket basshysy kıeli óńirde ótken Ulttyq quryltaıda urpaq tárbıesi, balalarǵa qatysty zorlyq-zombylyq, álimjettik, otbasy qundylyqtaryn saqtaý máselelerin kóterip, tıisti tapsyrma bergen bolatyn. Dıdary ózgergen dúnıede qazaq qoǵamyn ilgeri jeteleıtin osy kók órim jastar, zamannyń kóshinen qalmaı kele jatqan óskeleń urpaq dep bilemiz. Alaıda, sońǵy ýaqyttaǵy keleńsiz jaǵdaılar qoǵamda alańdaýshylyq týdyryp otyr. Qoǵamdaǵy stıgmatızatsııa, osyndaı faktilerdiń jyly jabylýy, ashyq aıtylmaýyna baılanysty resmı derek pen shynaıy kórsetkishtiń arasy alshaq bolýy da yqtımal. Kóptegen qylmystyq is ashylmaǵan kúıi qalady. Naqty derek-dáıek anyq bolmaǵan soń, máselemen kúresýdiń mehanızmderi de tıimdi bolmaıtynyn eskerýimiz kerek. Otbasy ınstıtýty, bala qaýipsizdigi, qoǵam qundylyǵy, adamnyń ómiri men bostandyǵy, zań men tártip turǵysynan áli de tereńinen qaýzaıtyn túıtkildi másele kóp ekenin kórip otyrsyzdar. Óńirler boıynsha aıtar bolsaq, osy jarty jyldyń ishinde balalarǵa zorlyq-zombylyq kórsetken qylmystyń kóbi Jambyl, Pavlodar, Atyraý, Almaty, Qyzylorda oblystarynda bolǵan. Zertteýler balalarǵa zorlyq-zombylyq kórsetetin qylmyskerdiń portretin de daıyndaǵan. Qazaqstandaǵy búldirshinderge qatygezdikpen jábir kórsetkender, eń aldymen ózderi tanıtyn, jaqyn aralasatyn adamdar ekeni anyqtalǵan. Bıyl «Balalar máselesin BAQ-ta qalaı qaýipsiz jarııalaýǵa bolady» degen taqyrypta praktıkalyq nusqaýlyqty jarııalady. Balalar taqyryby týraly jazǵanda da aqparat alańynda óte muqııat bolǵanymyz abzal», – dedi.
Aıta keteıik, is-sharany uıymdastyrýdyń sebebi – aýyr qylmystyń jurt bolyp jıylyp sheshimin tabý, qoǵamda ádep normasyn qalyptastyrý, profılaktıka sharasyn egjeı-tegjeıli talqylap, azamattyq sektor, jaýapty organdarmen birlesip jedel is-qımyl jasaý.
