MINISTR TÚRKISTANDA DIN MAMANDARYMEN KEZDESTI (FOTO)
Búgin Túrkistan tórinde Memleket basshysy Qasym-Jomart Toqaevtyń Ulttyq Quryltaıdyń «Ádiletti Qazaqstan – Adal azamat» atty ekinshi otyrysynda kótergen rýhanı máseleler boıynsha respýblıkalyq dóńgelek ústel ótti.
Jıynǵa Aqparat jáne qoǵamdyq damý mınıstri Darhan Qydyráli, Bas múftı Naýryzbaı qajy Taǵanuly, Túrkistan oblysynyń ákimi Darhan Amangeldiuly, Qazaqstan Respýblıkasy Bala quqyqtary jónindegi ýákili Dınara Bolatqyzy, sondaı-aq QMDB janyndaǵy Aqsaqaldar keńesiniń, Ǵulamalar keńesiniń músheleri, ımamdar, elimizdegi jalǵyz dinı joǵarǵy oqý orny Nur-Múbarak ýnıversıtetiniń, aqparattyq-nasıhattaý, ońaltý ortalyqtarynyń ókilderi qatysty.
Mınıstr Darhan Qýandyquly Ulttyq Quryltaıdyń ekinshi otyrysynda el Prezıdenti kótergen rýhanı máselelerge qatysty pikirin bólisip, din mamandarynyń qyzmetin tilge tıek etti.
Al Dinı basqarmanyń rýhanııat salasynda atqaryp jatqan jumystaryna toqtalǵan Bas múftı Naýryzbaı qajy Taǵanuly: «Ózderińiz bilesizder, Aqparat jáne qoǵamdyq damý mınıstrliginiń jumys baǵytynyń biri – din salasy. Atap aıtqanda, destrýktıvti dinı aǵymdardy ustanýshylardy ońaltý, ınternet keńistikte dinı Ekstremızmniń aldyn alý, dinı qyzmet salasyndaǵy memlekettik qyzmetter, dinı birlestiktermen ózara is-qımyl, dinı jáne dintaný bilimi, aqparattyq-túsindirý jumysy, dintaný saraptamasy sekildi jumystar júrgizip keledi.
Qazaqstan musylmandary dinı basqarmasy da elimizdiń musylmandaryna dinı-rýhanııattyq basshylyq jasaıtyn respýblıkalyq birlestik retinde el musylmandaryna Islam dinin nasıhattaý, sharıǵattyń durys oryndalýyn qamtamasyz etý, Qazaqstan musylmandarynyń birligin saqtaý, musylman jamaǵatynyń dinı máselelerin sheshý, din mamandaryn daıarlaý, dinı basylymdar men kitaptar shyǵarý, sondaı-aq sheteldik dinı uıymdarmen qarym-qatynas ornatý sekildi baǵyttar boıynsha jumys júrgizilýde» dedi.
Aıta keteıik, jıynnyń maqsaty – Prezıdent kótergen rýhanı máselelerdiń sebebimen kúresýdiń joldaryn naqtylaý, salaǵa qatysty mamandarǵa baǵyt-baǵdar berý.
