Mońǵolııa múftıi: Arǵy bettegi aǵaıyn QMDB-nyń qoldaýyn sezinedi (FOTO)

Qazaqstan musylmandary dinı basqarmasynyń tóraǵasy, Bas múftı Serikbaı qajy Oraz Astanada Mońǵolııa musylmandar odaǵynyń tóraǵasy, qandasymyz, múftı Batyrbek qajy Hadysulyn qabyldady. Resmı kezdesýge QMDB tóraǵasynyń birinshi orynbasary, Astana qalasynyń bas ımamy Naýryzbaı qajy Taǵanuly, QMDB Halyqaralyq qatynas jáne protokol bóliminiń meńgerýshisi Ershat Ońǵarov qatysty.

Qadirli qonaq jańa ǵımaratqa qonys aýdarǵan Bas múftıdi, Qazaqstan musylmandary dinı basqarmasynyń ujymyn quttyqtap, shynaıy tileýlestigin bildirdi.

Kezdesýde múftıler dinı tatýlyq, qazirgi syn-qaterlermen birlese kúresý, salt-dástúrdi jańǵyrtý, t.b. máseleler tóńireginde jan-jaqty pikir alysty. Bas múftı Serikbaı qajy Satybaldyuly Dinı basqarma tarapynan Mońǵolııa elindegi meshitter men ımam-moldalarǵa qoldaý kórsetý sharalary jalǵasa beretinin jetkizdi.

«Biz, Mońǵolııanyń dindar qaýymy Qazaqstan musylmandary dinı basqarmasynyń bastamalaryna árqashan tileýlestik bildirip otyramyz. Sizderdiń qamqorlyqtaryńyzǵa aıryqsha alǵysymdy bildiremin. Arǵy bettegi aǵaıyn QMDB-nyń qoldaýyn árqashan sezinedi», – dedi B.Hadysuly.

Bas múftı Mońǵolııa múftıine Astanada 2019 jyldyń 11 sáýirinde ótetin Qazaqstan musylmandary dinı basqarmasy men Reseı múftıler Keńesiniń birlese uıymdastyratyn «Rýhanı Jibek joly. Islam jáne jastar: qazirgi zaman syn-qaterleri» atty IV Halyqaralyq ǵylymı-dinı konferentsııanyń maqsaty jaıly áńgimelep berdi. Sonymen qatar, Batyrbek Hadysulyn aıtýly sharanyń qadirli qonaǵy bolýǵa shaqyrdy.

Mártebeli meıman múftııattyń bul ıgi bastamasyna tileýlestik bildirdi.