«MUFTIYAT» BASPASYNAN ShYQQAN TÓRT KITAPTYŃ TANYTYMY ÓTTI (FOTO)
Búgin elordada Qazaqstan musylmandary dinı basqarmasynyń «MUFTIYAT» baspasynan jaryq kórgen tórt kitaptyń tanytymy ótti.
Saltanatty rásimge Bas múftı Naýryzbaı qajy Taǵanuly bastaǵan múftııat ujymy qatysyp, oqyrmanǵa jol tartqan «Jánnatpen súıinshilengen 10 sahaba», «Tabys teorııasy (musylman motıvatsııasy)», «Ramazan orazasyna qatysty pátýalar» jáne «Oraza (ádebi, mindetteri, paıdasy men artyqshylyqtary)» kitaptarymen tanysty.
«Dinı basqarma árqashan kitap shyǵarý men baspa qyzmetine udaıy kóńil bólip keledi. Sońǵy eki jyl ishinde tól baspamyzdan 54 eńbek jaryq kórdi. Atap aıtsaq, «MUFTIYAT» baspasynan 11 Quran jəne təpsir, 9 ǵylymı jəne tarıh kitaptary, 3 Paıǵambarymyz (oǵan Allanyń salaýaty men sálemi bolsyn) týraly, 13 qoǵamǵa qatysty kitaptar, sondaı-aq otbasyǵa qatysty 4 jáne 14 sharıǵat kitaptary oqyrmanǵa jol tartty. Búgin tanytymy ótip otyrǵan tórt kitap ta oqyrmandar úshin paıdaly, rýhanı azyq bolady degen senimdemin. Osy kitaptardyń jaryq kórýine atsalysqan azamattarǵa, baspa dırektory Murat Manapuly men ujymyna alǵysymdy bildiremin» dedi Bas múftı Naýryzbaı qajy Taǵanuly.
