MÚMKINDIGI ShEKTEÝLI JANDARǴA BIR MEZETTE DUǴA JASALDY (FOTO)
Búgin Halyqaralyq múgedekter kúni qarsańynda QMDB «Zeket jáne qaıyrymdylyq» qorynyń uıymdastyrýymen besin namazy kezinde elimiz boıynsha bir mezette Quran oqylyp, duǵa jasaldy.
Astanadaǵy Respýblıkalyq bas meshitte ótken aıtýly sharaǵa QMDB Tóraǵasy, Bas múftı Naýryzbaı qajy Taǵanuly arnaıy qatysyp, elimizdegi múmkindigi shekteýli jandarǵa, olardyń asyraýshylary men dárigerlerge, qamqorlyq tanytyp júrgen azamattar úshin arnaıy duǵa jasady.
«Jaratqan Alla búgingi meshitterimizde múmkindigi shekteýli jandar úshin jasalyp jatqan duǵalarymyzdy qabyl ete gór. Alla Taǵala taǵdyrdyń synaǵyna ushyraǵan jandardyń dertine shıpa, denderine saýlyq ber. Jaratqan Alla olarǵa týra jolyńdy, ımanyńdy násip et. Olardyń tez arada saýyǵyp ketýin násip et. Otbasylaryna amandyq ber. Ámın» dedi Bas múftı jamaǵatpen birge jasaǵan duǵasynda.
Aıta keteıik, Bas meshitte ótken is-sharaǵa besin namazyna kelgen jamaǵat túgel qatysyp, barshasy duǵa jasady.
Eske salaıyq, múmkindigi shekteýli jandardyń halyqaralyq kúni 1992 jyldan beri BUU Bas Assambleıasy aıasynda atap ótiledi. Bıylǵy jyldyń taqyryby múgedekterdiń qajettiligin eskere otyryp, pandemııadan keıingi ınklıýzıvti jáne turaqty álemge jol salý dep atalady.
