«MUNARA» GAZETINIŃ ÚSTEL TENNISINEN TÝRNIRI ÓTTI (FOTO)
Búgin elordada «Munara» rýhanı-tanymdyq gazetiniń uıymdastyrýymen BAQ qyzmetkerleriniń merekesi qarsańynda jýrnalıster arasynda ústel tennısinen týrnır ótti.
Osymen úshinshi ret jýrnalıster merekesine oraı uıymdastyrylǵan sporttyq sharanyń maqsaty – jýrnalıstermen tyǵyz baılanys ornatyp, yntymaqtastyqty arttyrý, salaýatty ómir saltyn nasıhattaý jáne merekelik kóńil-kúı qalyptastyrý.
Dinı basqarmanyń tól basylymdary – «Iman» jýrnaly men «Munara» gazetiniń bas redaktory Serikbol Hasan ústel tennısinen dástúrli týrnırge qoldaý bildirip kelgen barsha áripteske, ásirese Almatydan arnaıy kelgen televızııa maıtalmany Qaınar Oljaıǵa jáne jýrnalıstıka ardageri Sharhan Qazyǵulǵa rızashylyǵyn jetkizdi. Óz kezeginde Qaınar Oljaı jýrnalıster arasynda fýtbol, voleıbol, bılıardtan týrnırler jıi uıymdastyrylyp turatynyn, al ústel tennısi BAQ ókilderi arasynda kóp nasıhattala bermeıtinin aıtyp, Dinı basqarma basylymdarynyń redaktsııasyna alǵysyn bildirdi.
Bıylǵy týrnırge elordada qyzmet etip júrgen baspasóz salasynyń 16 ókili qatysyp, qyzyqty ári tartysty oıyn órnegin kórsetti. Tórt toptan pleı-off kezeńine joldama alǵan 8 myqty ózara bas júldeni sarapqa saldy. Nátıjesinde, dástúrli týrnırdiń alǵashqy jeńimpazy «Qazaq radıosynyń» dıktory Muhamedálı Bolatuly top jardy. Al Respýblıkalyq bas meshittiń baspasóz hatshysy Narıman Amanjolov bıyl da júldeli ekinshi oryndy ıelense, byltyrǵy týrnır jeńimpazy «KTK» arnasynyń beıneınjeneri Rústembek Isaev úshinshi oryndy qanaǵat tutty. Sondaı-aq toptyq kezeńnen ótken 5 qatysýshy yntalandyrý syılyqtarymen marapattaldy.
