«Munara tv» Qadir túninde 5 saǵat tikeleı Efır usyndy (FOTO)
Qazaqstan musylmandary dinı basqarmasynyń «Munara TV» telearnasy qasıetti Qadir túnine oraı tikeleı Efırde bes saǵattyq baǵdarlama usyndy.
Efırde aldymen QMDB Tóraǵasy Naýryzbaı qajy Taǵanuly Qadir túniniń ulyqtyǵy men qasıeti jaıynda jamaǵatqa ýaǵyz aıtty. Keıin quptan jáne taraýyq namazdary oqylyp, Bas múftı Quran hatym duǵasyn jasady. QMDB Tóraǵasy qasıetti keshte eldiń amandyǵy, birligi, tutastyǵy men turaqtylyǵy úshin duǵa etti. Odan ary quptan namazynan bastap tań namazyna deıin «Munara TV» arnasy úzbeı tikeleı Efırde habar taratty.
Respýblıkalyq «Áziret Sultan» meshitinde ótken Qadir túngi qulshylyq-ǵıbadatqa Premer-mınıstrdiń orynbasary Eraly Toǵjanov, Nur-Sultan qalasynyń ákimi Altaı Kólginov, basqa da el aǵalary, zııaly qaýym ókilderi qatysyp elorda jurtshylyǵyna izgi lebizin jetkizdi.
Sondaı-aq «Myń aıdan da qaıyrly Qadir túni» jobasy QMDB Tóraǵasy Naýryzbaı qajy Taǵanulynyń suhbatynan bastaý alyp, naıb múftı Ershat Aǵybaıuly, QMDB Tóraǵasynyń keńesshisi Kenjetaı Baıkemeluly, «Ýaqyp» qorynyń dırektory Ardaq Orazbaı, Dinı ońaltý bóliminiń meńgerýshisi Hasan Amanqul jáne Ýaǵyz-nasıhat bóliminiń mamany Dýman Saıfollanyń qasıetti túnniń mańyzy týraly suhbattarymen jalǵasty.
Tikeleı Efır barysynda taraýyh namazyn bastan-aıaq oqyp, eldiń yqylasyna bólengen jas qarı Mansurhan Valıhan arnaıy suhbat berse, aqsaqaldar aq batasyn jaýdyrdy. Qadir túnine arnalǵan Efır «MUNARA TV» arnasynan bólek 5 saǵat boıy QMDB-nyń áleýmettik jelilerinde de taratyldy.
