«MUNARA TV» JANYNAN KÓRKEMDIK KEŃES QURYLDY (FOTO)
Búgin elordada Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanulynyń jyl basynda joldaǵan baǵdarlyq baıandamasyna sáıkes «Munara TV» arnasyn damytý jáne jumysyn jetildirý maqsatynda kórkemdik keńes quryldy.
QMDB janyndaǵy Respýblıkalyq bas meshitte ótken keńestiń alǵashqy jıynyna Bas múftı Naýryzbaı qajy Taǵanuly jáne tele-radıo salasynyń bilikti mamandary, tanymal dıktor, telejýrnalıster qatysty.
«2021 jyly Dinı basqarmanyń tól telearnasy «Munara TV» arnasy kórermenge jol tartty. Qazirgi tańda tsıfrly habar taratý jelisinde búkil eldi qamtyp otyr. Respýblıkalyq meshitterdiń janynda stýdııalary bar arna táýligine 20 saǵat habar taratyp keledi. Arna jumysyn jetildirý men damytý jolynda kórkemdik keńes quryp otyrmyz. Maqsatymyz – asyl dinimizdi nasıhattap, ata dástúrimizdi jańǵyrtý. Ulttyq muralarymyzdy halyqqa jetkizý.
Arnada tek din taqyryby emes, otbasyn saqtaý, bala tárbıesi, izgi qoǵam qalyptastyrý, jaqsy ana, ákeniń orny, Qudaıy qonaq, jyr-nasıhat, áıelder álemine arnalǵan baǵdarlamalar bar. Sizdermen basqosýdaǵy maqsatymyz – qazirgi qoǵamǵa qajetti qandaı kontent daıyndaý keregin, halyqtyń dinı suranysyn, qazaq halqy ustanatyn dástúrli ıslamdy nasıhattaý joly jaıynda aıtyp, usynystaryńyzdy jetkizseńizder degen oıdamyz» dedi Bas múftı Naýryzbaı qajy Taǵanuly.
Óz kezeginde elimizge belgili dıktor, telejýrnalıst Zeıin Álipbek, «Habar agenttigi AQ» Basqarma Tóraǵasynyń orynbasary Dáýlethan Jıenqulov, «Abai TV» arnasynyń dırektory Azamat Keńesuly, «Qazaq radıolary» JShS Bas redaktory Dýlat Abıbýllaev, «Qazcontent» AQ Basqarma tóraǵasy Bekzat Júsip, tanymal jýrnalıst, bloger Ashat Sadyrbaı «Munara TV» arnasyn damytý men arna jumysyn jetildirýge qatysty tushymdy oı-pikirlerin jetkizdi.
