Myrzataı Joldasbekovtiń 85 jyldyǵyna arnalǵan halyqaralyq konferentsııa ótti (FOTO)
Elordadaǵy L.N.Gýmılev atyndaǵy EUÝ-diń bas ǵımaratynda kórnekti memleket jáne qoǵam qaıratkeri, túrkitanýshy-ǵalym, QMDB Aqsaqaldar keńesiniń múshesi Myrzataı Joldasbekovtiń 85 jyldyǵyna arnalǵan halyqaralyq ǵylymı-praktıkalyq konferentsııa ótti.
«Túrki jazba eskertkishteri: tili, tarıhy jáne mádenıeti» taqyrybynda ótken konferentsııaǵa ǵalymdar, aqyn-jazýshylar, bilim, mádenıet, óner salasy mamandary, memlekettik qyzmetkerler, elshiler, BAQ ókilderi, bilim alýshylar qatysty.
Konferentsııa barysynda Premer-mınıstrdiń orynbasary Eraly Toǵjanov, Bilim jáne ǵylym mınıstri Ashat Aımaǵambetov, Májilis depýtaty Saýytbek Abdrahmanov, L.N.Gýmılev atyndaǵy EUÝ-diń rektory Erlan Sydyqov, memleket jáne qoǵam qaıratkeri Qýanysh Sultanov, QMDB Tóraǵasy, Bas múftı Naýryzbaı qajy Taǵanuly, aqyn Nesipbek Aıtuly t.b belgili tulǵalar baıandama jasap, aqjarma tilegin jetkizdi.
«Sizdiń qazaq mádenıeti, ádebıetin zertteýge qosqan úlesińiz –keleshek urpaq úshin úlken mura. Sonyń ishinde jyraýlar, aqyndar, Jambyl shyǵarmashylyǵy, Túrik qaǵanaty kezindegi Orhon-Enıseı jazba eskertkishterin qazaq ǵalymdary arasynda alǵashqylardyń biri bolyp jańasha zerdeleýińiz, qazaq tilindegi aýdarmasyn ǵylymı aınalymǵa engizýdegi eren eńbegińiz tutas bir ǵylymı jobaǵa júk bolady» degen Bas múftı QMDB Aqsaqaldar keńesiniń múshesi Myrzataı Joldasbekulynyń ıyǵyna shapan jaýyp, qurmet kórsetti.
Aıta keteıik, búgin memleket jáne qoǵam qaıratkeri Myrzataı Joldasbekov 85 jasqa tolyp otyr. Ol eńbek jolynda mınıstr, Premer-mınıstrdiń orynbasary, elshi, ýnıversıtet rektory, Prezıdent ortalyǵynyń basshysy sııaqty jaýapty laýazymdardy abyroımen atqardy. «Ejelgi ádebıet nusqalary», «Kúltegin», «Asyl sózdiń atasy», «Kisilik kitaby», «Tańǵalamyn ómirdiń ǵajabyna» sekildi birqatar kitaptary jaryq kórdi.
