Mysyrda birqatar kezdesýler ótti (FOTO)
QMDB Tóraǵasynyń orynbasary Ershat qajy Ońǵar Mysyrǵa sapary barysynda birqatar mańyzdy kezdesýler ótkizdi.
Naıb múftı Mysyr Arab Respýblıkasynyń Ýaqyp isteri mınıstri jáne Islam isteri jónindegi Joǵarǵy Keńestiń tóraǵasy, professor Muhtar Jumamen, Mysyr múftıi Shaýqı Allammen, ál-Azhar sheıhynyń orynbasary Muhammed Abdýrahman Dýanımen, Mysyrdyń burynǵy múftıi Alı Jumamen jáne Islam zertteý akademııasynyń prezıdenti Nazır Aıatpen kezdesip, eki el arasyndaǵy dinı oqý, ǵylym, tarıh, mádenıet salasyndaǵy baılanystardy odan ári damytý maqsatynda suhbat júrgizdi.
Kezdesýde Ýaqyp isteri mınıstri Muhtar Juma Beıbarys sultan babamyz turǵyzǵan kóne meshitti qaıta qalpyna keltirý jumystaryn jalǵastyrý maqsatynda mınıstrlik tarapynan 2 mıllıon dollar qarajat bólingenin jetkizdi. Alla qalasa, Beıbarys sultan meshiti 2023 jyly tolyq el ıgiligine beriledi dep kútilýde.
Sondaı-aq Ershat qajy Ońǵar Qazaqstannyń Mysyr Respýblıkasyndaǵy Tótenshe jáne ókiletti elshisi Qaırat Lama Sharıfpen kezdesip, QMDB Tóraǵasy, Bas múftı Naýryzbaı qajy Taǵanulynyń sálemin jetkizdi. Elshilikte Qaırat Lama Sharıf, Ershat qajy Ońǵar jáne Nur-Múbarak ýnıversıtetiniń prorektory Qaırat Qurmanbaevtyń qatysýymen ál-Azhar ýnıversıtetinde bilim alyp jatqan qazaqstandyq stýdenttermen kezdesý uıymdastyryldy.
Stýdenttermen kezdesken naıb múftı QMDB Tóraǵasy, Bas múftı Naýryzbaı qajy Taǵanulynyń bastamasymen 2022 jyl QMDB aıasynda «Islam – yntymaq pen birlik dini» bolyp jarııalanǵanyn, múftııattyń bıylǵy jeti jumys baǵyty boıynsha atqarylyp jatqan is-sharalar týraly baıandady.
Ál-Azhar ýnıversıtetinde oqyp jatqan qazaqstandyq stýdentterge sapaly bilim alyp, elge oralýdyń mańyzdylyǵy, Qazaq eline qyzmet jasaý, Islam dininiń damýy men Otan aldyndaǵy mindetti atqarý musylmannyń paryzy ekeni aıtyldy.
