Naıb múftı qajylyq Elektrondy júıesiniń basshysymen kezdesti (FOTO)
QMDB Tóraǵasy, Bas múftı Naýryzbaı qajy Taǵanuly bastaǵan delegatsııanyń Saýd Arabııasy Koroldigine resmı sapary aıasynda naıb múftı Ershat Aǵybaıuly qasıetti Mekke qalasynda Qajylyq Elektrondy júıesiniń basshysy Farıd bın TaHa Mendermen kezdesti.
Kezdesý barysynda Farıd Mender qazaqstandyq delegetsııaǵa Qajylyq Elektrondy júıesindegi osy jyly engen jańa qyzmetterdi tanystyryp, pandemııa jaǵdaıynda uıymdastyrylatyn qajylyq maýsymyna qatysty jańa talaptardyń mańyzdylyǵyn túsindirdi. Ásirese egde jastaǵy qajylardyń densaýlyqtary men qaýipsizdigi úshin bıylǵy jyly 65 jastan asqan azamattardyń qajylyq paryzyn óteı almaıtyndyǵyn tilge tıek etti. Naqty aıtqanda, qajylyq Elektrondy júıesi 1957 jyldyń 1 shildesine deıin dúnıege kelgen azamattardy avtomatty túrde qabyldamaıtynyn, sondaı-aq, olardyń qajylyq vızasyn ala almaıtyndyǵyn jetkizdi.
Óz kezeginde QMDB tóraǵasynyń orynbasary Ershat Aǵybaıuly Elektrondy júıe basshysy Farıd Mender myrzaǵa bıylǵy jyly Qazaqstanǵa bólingen 3000 qajylyq orynnyń týrıstik fırmalarǵa arnaıy konkýrs negizinde bólingendigin, sáıkesinshe endigi kezekte osy oryndardyń qajylyq Elektrondy júıesinde tıisti fırmalarǵa úlestirý jumystarynyń júrip jatqandyǵyn habarlap, Qazaqstan qajylyq mıssııasynyń Elektrondy júıedegi uıymdastyrý-úılestirý jumystaryna kórsetip jatqan kómegi úshin alǵysyn bildirdi.
Qajylyq Elektrondy júıesiniń basshysy da Qazaqstan qajylyq mıssııasyna SAK qasıetti sapardy uıymdastyrýda qajylyq Elektrondy júıesin engizgen alǵashqy maýsymynan bastap kóptegen qıyndyqtarǵa qaramastan qoldaý bildirip, túrli usynys-pikirleri arqyly atalmysh júıeniń damýyna qosyp kele jatqan úlesi úshin erekshe alǵysyn aıtty.
Taraptar bıylǵy qajylyq maýsymyna baılanysty júrip jatqan daıyndyq jumystarynyń ózge de máselerine toqtalyp, ózara pikir almasty.
