Naýryzbaı qajy Taǵanuly: Adamnyń bostandyǵynan asqan qundylyq joq (FOTO)
Búgin Nur-Sultan qalasynda el táýelsizdiginiń 30 jyldyq mereıtoıyna oraı bastalǵan halyqaralyq konferentsııada Bas múftı Naýryzbaı qajy Taǵanuly «Táýelsiz Qazaqstan jáne Dinı basqarma» taqyrybynda negizgi baıandama jasady.
QMDB Tóraǵasy táýelsizdik jolynda ata-babalarymyz bastan keshken náýbetti shaqtardy eske sala kele, qıyn-qystaý zamanda qazaq halqyn baýyryna basyp, qamqorlyǵyn kórsetken, Qazaqstannyń táýelsizdigin birinshi bolyp moıyndaǵan baýyrlas Túrkııa eline rızashylyq nıetin jetkizdi. Sondaı-aq halyqaralyq konferentsııamyzǵa qatysyp, qoldaý bildirip otyrǵan mártebeli din qaıratkerlerine, shet elderdiń elimizdegi elshilerine alǵys bildirdi.
«Búgingi halyqaralyq konferentsııanyń negizgi ózegi – jastardy «men elimniń ósip-órkendeýine qandaı úles qosa alam?» degen oılarǵa jeteleý, sonymen qatar táýelsizdik qadirin barynsha sezindirý. Adamnyń bostandyǵy men quqyǵyn qadirleıtin, onyń ary men namysyn qasterleıtin qasıetti dinimiz táýelsizdigimizdi de baǵalaı bilýge shaqyrady.
Rasynda, adamnyń quqyǵy men bostandyǵynan asqan qundylyq joq. Adamzat balasyn birlik pen ıgilikte ómir súrýge úndegen Paıǵambarymyz Muhammed (oǵan Allanyń salaýaty men sálemi bolsyn) bir hadısinde: «Musylmannyń qany, dúnıe-múlki jáne ar-namysy ózge musylmandarǵa haram», – degen. Osy rette Sizderdiń taraptaryńyzdan aıtylar taǵylymdy oılar men mazmundy baıandamalar elge tutqa bolar jas urpaqtyń sanasyna sáýle shashyp, táýelsizdiktiń qadirin uǵyna túsýge úndeıdi dep senemin», – dedi Naýryzbaı qajy Taǵanuly.
