NAÝRYZBAI QAJY TAǴANULY MAROKKO KOROLDIGINIŃ ÝAQYPTAR JÁNE ISLAM ISTERI JÓNINDEGI MINISTRIMEN KEZDESTI (FOTO)
QMDB Tóraǵasy, Bas múftı Naýryzbaı qajy Taǵanuly Marokko Koroldigine sapary barysynda osy eldiń Ýaqyptar jáne Islam Isteri jónindegi mınıstri Ahmad at-Taýfıqpen kezdesti.
Mınıstr eń aldymen Bas múftı Naýryzbaı qajy Taǵanulymen osy eldegi Qazaqstannyń Tótenshe jáne Ókiletti Elshisi Sáýlekúl Saılaýqyzyn jyly qabyldap, atqarylyp jatqan jumystardy tanystyryp ótti. Sondaı-aq jaqynda ǵana Qazaqstanǵa barǵan sapary jóninde áńgimeledi.
«Qazaq elin biz ózimizge jaqyn dos memleket retinde qabyldaımyz. Men Sizdiń elde úsh ret qonaq boldym. Ózińizdi Marokko jerinde kórgenime qýanyshtymyn. Endigi maqsatymyz – Qazaqstanmen rýhanı, dinı baǵytta tereń baılanys ornatyp, ortaq baǵytta birigip jumys isteý. Keler jyly qazaq topyraǵynan shyqqan ustaz ál-Farabı murasyn nasıhattaý maqsatynda Marokko jerinde ǵalymdardyń qatysýymen sımpozıým ótkizý josparda bar. Qazaqstannan kelip bilim alam degen stýdentter úshin esigimiz ashyq» dedi mınıstr.
Mártebeli mınıstrge qonaqjaılylyǵy men jyly qabyldaýy úshin alǵys bildirgen Bas múftı ekijaqty kezdesýde aıtylǵan bastamalardy ońynan qabyldady.
«Búgin – tarıhı kún. Qazir eki el arasyndaǵy dinı baǵyttaǵy qarym-qatynastyń damýyna kýá bolyp otyrmyz. Alǵashqy qadamdy birigip jasadyq. Meniń Marokko Koroldigine alǵashqy saparym ortaq maqsattarymyzǵa degen naqty qadam der edim. Bıyl eki el arasyndaǵy dıplomatııalyq qatynastardyń ornaǵanyna 30 jyl toldy. Osy oraıda Sizdiń musylman eldermen qarym-qatynasyńyzdy jaqsartýdaǵy, onyń ishinde Qazaqstanmen aradaǵy yntymaqtastyqty tereńdetýge degen izgi nıetińizdi atap ótkim keledi. Osy múmkindikti paıdalana otyryp, men ózimniń rızashylyǵymdy taǵy bir ret bildirip, mártebeli mınıstr Sizge amandyq pen esendik, sondaı-aq Marokko halqy barlyq salada damı bersin degen tilegim bar» dep Bas múftı Óziniń izgi nıetin jetkizdi.
Ekijaqty kezdesýden soń Naýryzbaı qajy Taǵanuly mınıstr Ahmad at-Taýfıqtyń ıyǵyna shapan jaýyp, qurmet kórsetti.
