Naýryzbaı qajy Taǵanuly Túrkııa ǵulamalar keńesiniń jumysymen tanysty (FOTO)
Búgin QMDB Tóraǵasy, Bas múftı Naýryzbaı qajy Taǵanuly bastaǵan delegatsııa Ankaradaǵy Túrkııa Din isteri basqarmasyna qarasty Ǵulamalar keńesiniń jumysymen tanysty.
Kezdesý barysynda Bas múftı keńes múshelerimen pikir almasyp, qazirgi qoǵamdaǵy ózekti pátýalardy qabyldaý barysyndaǵy jańashyldyq baǵyttar jaıynda sóılesti.
Delegatsııany qabyldap, Ǵulamalar keńesiniń qazirgi jumysy týraly baıandaǵan tóraǵa Ábdirahman Hachkalynyń aıtýynsha keńestiń quramynda 16 adam bar. Bir jyldyń ishinde 60 myń pátýa shyǵarǵan.
Sondaı-aq delegatsııa quramynda kelgen naıb múftı, sharıǵat jáne pátýa bóliminiń meńgerýshisi Sansyzbaı Qurbanuly sońǵy jyldary Ǵulamalar keńesi shyǵarǵan pátýalardy tanystyryp, kúrdeli dinı sheshimder týrasynda óz oıyn ortaǵa saldy.
Kezdesý sońynda taraptar sharıǵı máselelerdi birigip talqylap, ortaq sheshim shyǵarý barysynda birizdilikke kelýge ýaǵdalasty.
Aıta keteıik, búgin Bas múftı Naýryzbaı qajy Taǵanuly men Túrkııa Din isteri basqarmasynyń basshysy Álı Erbashtyń qatysýymen ótken kezdesýde Ǵulamalar keńesi jumysyn jandandyryp, ekijaqty tájirıbe almasýdy kózdeıtin ortaq joba qoldaý tapty.
