«Nur-Múbarak» stýdentteri aýyr naýqasqa shaldyqqan kýrstastaryna arnap qaıyrymdylyq jármeńkesin ótkizdi (FOTO)
Nur-Múbarak ýnıversıtetiniń stýdentteri qatar oqıtyn Sultan Edigege kómek retinde qaıyrymdylyq jármeńkesin ótkizdi. Bolashaǵynan zor úmit kúttirgen 3 kýrs stýdenti Sultan Edige kútpegen aýyr keselge shaldyqqan bolatyn.
Anasynan 5 jasynda aıyrylǵan Sultan jalǵyz ákesiniń tárbıesinde ósken. Bir aı buryn aıaǵyna belgisiz jara shyǵyp, dárigerler anyqtaı almaı áýre-sarsańǵa túsken Sultanǵa birneshe ret qate dıagnoz qoıylyp, 2 ret ota jasalǵan. Sonda da keseldiń beti qaıtpaǵan soń aýrýhanaǵa jatqyzylǵan Sultanǵa ıýıng sarkomasy degen qaterli isik dıagnozy qoıyldy. Analızder sheteldik ozyq klınıkalarǵa jiberilip, dıagnozdyń qaterli isik ekendigi rastalyp, tolyq aıyǵýǵa úmit bar degen habar alǵan.
Bolashaqtan úmiti zor jas jigit aýrýdy jeńip shyǵatynyna senimdi. Túrkııa qabyldaýǵa daıyn, alaıda Sultannyń túbegeıli emi úshin 56 mln teńge qajet. Sondyqtan qatar júrgen zamandastaryna kómekke jumylǵan Nur-Múbarak ýnıversıtetiniń stýdentteri qasıetti juma kúni namazǵa keletin jamaǵatqa arnap qaıyrymdylyq jármeńkesin uıymdastyrdy. Stýdentter qoldan kelgenshe túrli dámdi taǵamdar pisirip, ózderinde bar kitaptaryna deıin satýǵa shaǵyrap, túsken qarjyny Sultannyń emine jumsamaq. Sondaı-aq namazdarynda duǵa-tilek jasaýda.
Adamdy baqytqa jeteleıtin meıirim men mahabbat ekenin eskersek, meıirim qaıyrymdylyq arqyly kóbeıedi. Halqymyz «Sadaqany saýyńda ber» dep beker aıtpaǵan. Óıtkeni qasıetti Quranda 200-deı jerde Alla jolynda sadaqa berý, mal-dúnıesin jumsaýdyń artyqshylyǵy aıtylǵan. Paıǵambarymyz (Oǵan Allanyń ıgiligi men sálemi bolsyn) sadaqanyń artyqshylyǵy jaıly kóptegen ósıet aıtqan, máselen: «Sadaqa berýde asyǵyńdar. Óıtkeni apat sadaqadan oza almaıdy», - degen. Adam balasy sadaqa berýmen saýapqa kenelip qana qoımaı, Alla Taǵala onyń ómirine bereke darytyp qoıady. Tipti shynaıy tájirıbemen mashyqtanǵan, sadaqanyń qundylyǵyn túsingen musylmandar aılyq tabysynyń belgili bir bóligin qaıyrymdylyqqa jumsap otyrady. Sondyqtan júregi ımanmen nurlanǵan musylman, Siz de saýapty iske at salysyp, elime, dinime qyzmet etsem degen azamattyń aramyzǵa aman-esen qosylýyna at salysa alasyz.
Sultan Edigege kómekke arnalǵan esep shot Kaspi Gold: 5169 4931 7107 5966
Baıl.tel: +7 776 129 9017
