Nur-Múbarak ýnıversıtetin 400 túlek bitirdi (FOTO)
Elimizdiń din salasynyń mamandary jańadan 400-ge jýyq joǵary bilimdi ıslamtanýshy, dintanýshy, teologtarmen tolyqty. Nur-Múbarak ýnıversıtetinde bakalavrıat baǵdarlamasymen bilim alǵan stýdentterge saltanatty túrde dıplom men arnaıy marapattar tabystaldy.
Qazaqstan men Mysyr elderiniń ánuranymen bastalǵan qýanyshty jıynda betashar sóz sóılegen rektor, professor Muhammad ash-Shahhat Qazaqstandaǵy rektorlyq qyzmeti bastalǵan sátte stýdent atanǵan bıylǵy túlekterdiń ózine ystyq ekenin aıtyp, aǵynan jaryldy: «Tórt jyldyq oqý –bilimniń kilti ǵana, bilim joly endi bastalady. Ár sátterińizdi josparlap, ózderińdi úzdiksiz damytyńdar», – dep álemge meıirimdilikti súıinshilep, kásibı ómirge basqan alǵashqy qadamyna sáttilik tiledi.
Al prorektor, dotsent Qaırat Qurmanbaev: «Rýhanııat – memleket damýynyń úlken tiregi, al sizder rýhanııat ózegi bolǵan din ilimin úırendińizder. XXI ǵasyr talaby óte joǵary bolǵandyqtan, jahandaný talaptaryna, básekesine jaýap bere alý qajet», – dep, jas túlekterge senim bildirip, júrekjardy quttyqtaýyn arnady. Merekede «Talas» ansambli «Kóńilashar» kúıimen shashý shashyp, tanymal ónerpaz Serjan Áli túlekterdi ánmen quttyqtap, bıznes-keńesshi Jeńis Esenkeldın jastarǵa óz isiniń maıtalmany bolýǵa qysqa-nusqa nasıhat aıtyp ótti.
Marapattaý rásimi bakalavrıat baǵdarlamasyn qyzyl dıplommen támamdaǵan 44 túlekke «Úzdik stýdent» madaqtamasyn tabystaýmen bastaldy. 4 jyl boıy tek bilim alýda ǵana emes, belsendiligimin tanylǵan 24 túlekke arnaıy alǵyshat berilip, ekinshi joǵarǵy bilim alǵan 25 túlek, «Islamtaný», «Dintaný» mamandyqtarymen qosa «Psıhologııa» minor (maınor) boıynsha baǵdarlamany tolyq támamdaǵan 27 stýdentke arnaıy sertıfıkat tabystaldy.
Источник: Aidos
