Nur-Múbárak ýnıversıtetinde ǵylymı-tájirıbelik konferentsııa ótti (FOTO)
Kóp til bilý – el damýy úshin mańyzy zor qajettilik. Nur-Múbárak ýnıversıteti bul máseleni jiti nazarda ustap keledi. Osyǵan baılanysty Arab jáne aǵylshyn tili kafedrasynyń uıymdastyrýymen «Kóptildilik – búgingi zaman talaby» atty II stýdenttik ǵylymı-tájirıbelik konferentsııa ótti.
Qazaqstan men Mysyr eli arasyndaǵy altyn kópirge aınalǵan ýnıversıtettiń saltanatty sharasy qos eldiń ánuranymen bastaldy. Betashar sózde rektor, professor Mýhammad ash-Shahhat ál-Jındı jastardyń bilimge degen qushtarlyǵy men stýdentterdiń bir emes, birneshe tildi meńgerýge múmkindigi bar ekenin jetkizdi. Sondaı-aq, Arab fılologııasy fakýltetiniń dekany, PhD doktor Adam Mahmýd Ahmed fakýltette júrgizilip jatqan jumystar jaıly tanystyryp, stýdentterdiń belsendiligine rızashylyq bildirdi.
Konferentsııany kafedra oqytýshylary, f.ǵ.d. G.Rysbaeva jáne PhD doktorant O.Shaıahmetov uıymdastyrdy. Jıynda úsh sektsııa boıynsha jumys júrgizildi. Olar – «Arab tilin jetik meńgerý – bilikti ıslamtanýshy maman daıyndaýdyń negizi», «Shetel tiliniń qazirgi kezdegi zamanaýı kópmádenıet álemindegi róli», «Kóptildilik – zaman talaby».
Stýdentter ózderi alǵan taqyryptaryn qazaq, orys, aǵylshyn, arab tilderinde qorǵap shyqty. Al plenarlyq bólimde stýdentter úsh tilde baıandama jasady. Úsh tilde oqytýdyń negizgi maqsaty – birneshe tildi meńgergen, áleýmettik jáne kásiptik baǵdarǵa qabiletti, mádenıetti tulǵany damytý jáne qalyptastyrý.
Konferentsııaǵa 3 mamandyq boıynsha 54 stýdent qatysyp, A.Seıdalıeva, N.Dýlat, R.Júsip, A.Toıgajınov, R.Eleýsizbaeva, J.Jaksanov, B.Qudaıbergenov, Q.Harjaýbaı, Q.Sarsenova, A.Ospanova, S.Satybaldy, N.Noǵaeva, N.Pattal, A.Tobyqbaeva, E.Jumanqulov, A.Kóbeı, B.Áýbákirov, S.Saılaýbek sekildi 18 stýdent júldeli orynǵa ıe boldy.
Kóptildi bilim berý – mádenıetti tulǵa qalyptastyrýdyń ózegi. Sondyqtan mundaı konferentsııa bolashaq mamandarǵa kóptildi bilim berý baǵdarlamasy aıasynda təjirıbe jınaqtap, əlemdik deńgeıge qol jetkizýine múmkindik beredi.
