Nur-Múbarak ýnıversıtetinde qazaqtyń rýhy áýeledi
Ejelden keń dalanyń tósin emip, órisin jaılaǵan halqymyz taǵdyr tezine ushyrap, azattyq jolynda tórt ǵasyrǵa jýyq arpalysty. Júrektegi ımanyn ulttyq ónermen, jyr-terme, kúılerimen urpaqqa úndep, jigerlendirip keldi. Sol babalar rýhymen qýattanǵan qarakóz jastar jeltoqsannyń yzǵarly kúnderi qazaq halqynyń ór rýhyn jer jahanǵa pash etkenine – 35 jyl tolsa, sol kúnniń jańǵyryǵymen Táýelsizdik týynyń jelbiregenine – 30 jyl. Osy qasterli kúnge Nur-Múbarak ýnıversıteti ári óziniń 20 jyldyq mereıtoıyna erekshe daıyndyqpen keldi.
«Bul jastarǵa ónege, keıingi urpaqqa amanat bolatyn erekshe mereke bolǵandyqtan, babalarymyzdyń murasyn ulyqtaý arqyly jetkizýdi jón kórdik. Táýelsizdik jolynda qyzmet, ony saqtap qalý – árbirimizge amanat», – dedi mereıtoılyq sharaǵa uıytqy prorektor, dotsent Qaırat Qurmanbaev. Ýnıversıtet atynan arnaıy qurbandyq shalyp, el úshin qyrshyn ketkenderdiń rýhyna qasıetti Quran oqyp, duǵa jasaldy.
Ánuranmen bastalǵan «Dinı jyr-termeler – Táýelsizdik arqaýy» atty merekelik sharada qasıetti Quran áýelep, rektor, professor Muhammad ash-Shahhat pen QMDB Tóraǵa orynbasary, naıb múftı Kenjeáli qajy Myrzabaev ata-babalarymyz ben qurbandar rýhyna duǵa baǵyshtap, Qazaq eli, kúlli musylman jamaǵaty, álem bolashaǵy úshin arnaıy bata jasady. Bul keshti kórgen de armanda, kórmegen de armanda: babalar úni, attyń dúbiri, Uly dalanyń rýhy dombyranyń kúmbiri, saz syrnaıdyń saryny, qobyzdyń shanaǵynda sóılep, ónerpazdardyń kómeıinen tógildi. Elimizdiń túkpir-túkpirinen arnaıy shaqyrylǵan, ǵasyrlar murasyn, babalar amanatyn arqalaǵan jyrshy-termeshiler birinen soń biri halyq murasyn pash etti. Al keshtiń arnaıy qonaǵy qazaq jastarynyń jeltoqsanda muzdy jarǵan jalynyn ánmen jetkizgen belgili óner qaıratkeri Ábıirbek Tináli: «Jeltoqsan jeli ánine 16 jeltoqsanda týra 35 jyl tolady. Bul – Táýelsizdik jolynda qurban bolǵan qazaq jastarynyń jeńisi. Osyndaı qasterli kúndi erekshe atap ótip jatqan Nur-Múbarak ýnıversıtetiniń basshylyǵyna alǵysym sheksiz», – dep rızalyqpen «Jeltoqsan jeli» ánin áýeletti. Saltanatty sharanyń sońynda «Alataý serileri» barsha kórermenge rýh berip «Serpilip kók-aspany, Serpilsin sanasy, El men jer bizge amanat, Alashtyń balasy!» dep ánnen shashý shashty.
Arnaıy shaqyrylǵan qoǵam qaıratkerleri, qurmetti qonaqtar rızalyǵyn bildirip, erekshe rýh syılaǵan keshti uıymdastyrýshylarǵa alǵysyn jaýdyryp, Táýelsizdigimizdiń tuǵyrly, bolashaǵymyzdyń baıandy bolýyn tiledi.
