Nur-Sultan ákimdigi «Nur-múbarak» stýdentterine 14 grant bóldi (FOTO)
Bıyl alǵash ret Nur-Sultan qalasy ákimdigi Nur-Múbarak ýnıversıtetinde oqıtyn 14 stýdentke grant bóldi. Osyǵan oraı QMDB Tóraǵasy, Bas múftı Naýryzbaı qajy Taǵanuly, Nur-Sultan qalasy Din isteri jónindegi basqarma basshysy Nurdáýlet Álmuhanov, sondaı-aq grant ıegeri bolǵan stýdentter men magıstranttardyń qatysýymen onlaın jıyn ótti.
Onlaın sharada alǵash bolyp sóz tizginin alǵan QMDB Tóraǵasy, Bas múftı Naýryzbaı qajy Taǵanuly jańa oqý jylynyń bastalýymen jáne stýdentterdi grant ıegeri bolýymen quttyqtap, bilimniń mańyzdylyǵy hám dindegi amanat jóninde az-kem nasıhat aıtty.
«Elimizdiń turaqtylyǵy men birlik-berekesiniń artýy jáne dintanýshy mamandardy qoldaý úshin Nur-Sultan ákimdigi Nur-Múbarak ýnıversıtetinde oqıtyn 14 stýdentke grant bólip otyr. Sizderdiń jańa oqý jylyn jetistiktermen bastap, abyroımen aıaqtaýlaryńyzǵa tilektespin. Mundaı qoldaýdyń bári de Táýelsizdigimizdiń jemisi dep bilemin. Memlekettiń, ákimdiktiń dinge qamqorlyq jasaýy, dintanýshylarǵa grant bólýi buryn bolǵan emes. Ardaqty Paıǵambarymyz (oǵan Allanyń salaýaty men sálemi bolsyn): «Alla Taǵalam, senen paıdaly ilim, qorqatyn júrek, qabyl bolatyn duǵa tileımin» dep tilegen. Paıdaly ilim – bolashaqqa jeteleıtin dańǵyl jol. Otandy súıý tilmen ǵana emes, ispen de júzege asady. Sondyqtan, grant ıegerleri, elimizdiń yntymaq-birligi, elordamyzdyń ósip-ónýine úles qosasyzdar dep úmittenemin», – dedi Naýryzbaı qajy Taǵanuly.
Sondaı-aq6 Bas múftı Almatyǵa barǵanda Nur Mýbarak stýdentterimen arnaıy kezdesetinin aıta kelip, Nur-Sultan qalasy ákimdigine stýdentterge grant bólip, qoldaý bildirgeni úshin alǵys aıtty.
Óz kezeginde, Nursultan qalasy Din isteri jónindegi basqarma basshysy Nurdáýlet Álmuhanov: «Orys jáne qazaq tilinde teologııa jáne dintaný mamandary bizde tapshy bolǵannan keıin Nur-Múbarak ýnıversıtetindegi 12 bakalavr, 2 magıstrge Nur-Sultan ákimdiginiń granty bólindi. Al grant ıelerin ákimniń tóraǵalyǵymen qurylǵan arnaıy komıssııa anyqtady. Bul stýdentter oqý bitirgennen keıin kelisimshart talaptaryna saı elordanyń Din isteri jónindegi basqarmaǵa qarasty mekemelerde jumys isteıdi» deı kelip, shákirtterge tabys tiledi.
Nur-Sultan qalasy ákimdiginiń grantyna Nur-Múbarak ýnıversıtetiniń magıstranttary Murat Omarov, Janat Islamǵalıev jáne Nur-Múbarak ýnıversıtetiniń stýdentteri Mádı Tólbasy, Asylarman Shyrynhan, Alı Mahambetov, Aısultan Qazbek, Ǵanızat Batýhan, Jansal Saǵyntaev, Erlan Áldıbaev, Salımjan Iýldashev, Mınýra Sultan, Aıǵanym Shámshiqyzy, Ahmet Nurjigituly, Tolqyn Qýanyshbekqyzy ıe boldy.
Jıynda grant ıegeri Ǵanızat Batýhan pen Murat Omarov ózderine qamqorlyq jasaǵan el aǵalarynyń úmitin aqtaıtynyn aıtyp, alǵys bildirdi.
