Nur-Sultan, Almaty, Shymkent qalalary men Atyraý oblysynda karantın kúsheıedi
Keshe QR Premer-Mınıstriniń orynbasary Eraly Toǵjanovtyń tóraǵalyǵymen Qazaqstan Respýblıkasynyń aýmaǵynda koronavırýstyq ınfektsııanyń taralýyna jol bermeý jónindegi vedomstvoaralyq komıssııanyń otyrysy ótti dep habarlaıdy QazAqparat.
Keńes jumysyna memlekettik organdardyń ókilderi men óńirlerdiń basshylary qatysty. Kún tártibinde Epıdemıologııalyq jaǵdaıdyń órshýi jáne «omıkron» shtamynyń aınalymy máseleleri qozǵaldy. Densaýlyq saqtaý mınıstri Ajar Ǵınııat baıandama jasady. Ol Epıdemııalyq jaǵdaıdyń kúrdelenip jatqanyn atap ótti.
Tek sońǵy táýlikte 4 myńnan astam adamda vırýs anyqtaldy. Qazirdiń ózinde 4 aımaq «qyzyl» aımaqqa endi. Vedomstvoaralyq komıssııa ınfektsııa taralýyn boldyrmaý úshin sanıtarııalyq-karantındik sharalardy qatańdatý týraly sheshim qabyldady.
Atap aıtqanda:
- «jasyl» mártebesi bar tulǵalarǵa ǵana saýda-oıyn-saýyq ortalyqtary, saýda úıleri men karaokege kirýge ruqsat berý týraly normany uzartý;
- 13 qańtardan bastap «omıkron» shtamyn eskere otyryp, SPA-ǵa, sporttyq-saýyqtyrý jáne fıtnes-ortalyqtaryna tek «jasyl» mártebesi bar adamdarǵa ruqsat berý;
- 15 qańtardan bastap vaktsınatsııalaný mártebesine qaramastan shetelden kelgenderdiń barlyǵynda teris PTR testiniń mindetti túrde bolýy;
Sondaı-aq, «qyzyl» aımaqqa kirgen Nur-Sultan, Almaty, Shymkent qalalarynda jáne Atyraý oblysynda shekteý sharalaryn kúsheıtý usynyldy. Atap aıtqanda:
- 30 adamnyń qatysýymen «Ashyq» nysandarynda ótkiziletin eske alý sharalaryn qospaǵanda, buqaralyq is-sharalardy ótkizýge tyıym salý;
- Oıyn-saýyq, mádenı uıymdardyń qyzmetine, dinı sharalardy jáne ártúrli konferentsııalar men semınarlardy ótkizýge tyıym salý;
- Qoǵamdyq tamaqtaný oryndaryndaǵy bir ústeldegi adamdar sanyn 4 adamǵa deıin azaıtý;
- Oqýshylardyń onlaın nysanyndaǵy oqýlary 2022 jylǵy 31 qańtarǵa deıin, orta jáne joǵary oqý oryndarynyń barlyq kýrstaǵy stýdentteri úshin 2022 jyldyń 6 aqpanyna deıin;
- Bilim ortalyqtarynyń, balalar men eresekterge arnalǵan úıirmelerdiń jumysyn onlaın-formatqa kóshirý;
- Memlekettik organdar, ulttyq kompanııalar men kásiporyndar qyzmetkerleriniń keminde 70% qashyqtan jumys isteýge kóshýi tıis;
- Áleýmettik qashyqtyqty saqtaý múmkindigi úshin qoǵamdyq kólik sanyn kóbeıtý.
Keńes sońynda Vıtse-Premer ákimdikterge azamattardy vaktsınatsııalaý jáne qaıta vaktsınatsııalaý qarqynyn kúsheıtýdi, Úkimet qabyldaǵan sharalardyń saqtalýyn baqylaýǵa erekshe nazar aýdarýdy tapsyrdy.
