«ÓKILDIK SAǴATYNDA» ALMATY QALASYNYŃ ESEBI TYŃDALDY (FOTO)
Búgin Astanada Bas múftı Naýryzbaı qajy Taǵanulynyń tóraǵalyǵymen kezekti «ókildik saǵaty» ótti.
Onlaın formatta ótken jıynǵa QMDB qyzmetkerleri men Almaty qalasynyń ımamdary qatysty. Jınalys barysynda Naýryzbaı qajy Taǵanuly: «Biz buǵan deıin Abaı, Aqmola jáne Aqtóbe oblystary bas ımamdarynyń qatysýymen «ókildik saǵaty» jobasy aıasynda arnaıy jınalys ótkizdik. Bul jobanyń basty maqsaty – ımamdarymyzdyń óńirde atqaryp jatqan jumystarymen jaqyn tanysyp, tıisti nusqama, qajetti keńes berý, sonymen qatar QMDB qyzmetkerleri men oblys ımamdarynyń ortaq jumystaryn júıeli túrde úılestirý. «Ókildik saǵaty» jobasy dinı saladaǵy is-sharalarymyzdy sapaly ári joǵary deńgeıde uıymdastyrýǵa serpin beredi dep senemin» dedi.
Jınalys barysynda Almaty qalasynyń bas ımamy Tólebı Dádiluly Bas múftıge, QMDB qyzmetkerlerine jyl basynda bekitilgen bes baǵyt (din men dástúr, izgi qoǵam, ıhsan jáne nasıhat, dinı oqý-aǵartý, jat dinı aǵymdardan saqtandyrý) boıynsha atqarylǵan jumystar jaıly esep berdi. Máselen Almaty meshitterinde dinı saýat ashý kýrsyna 2399 shákirt qatyssa, múgedektigi bar 30 shákirtke aptasyna 1 ret dáris ótýde. «Nur-Múbarak» ýnıversıteti men «Ábý Hanıfa» medrese-kolledjiniń 119 stýdenti Almaty meshitterinde óndiristik tájirıbeden ótti.
Sonymen qatar bes baǵytqa jaýapty QMDB bólim meńgerýshileri Almaty qalasynyń ımamdaryna jumysty jetildirýge qatysty usynys-pikirlerin jetkizdi.
Jıyn sońynda QMDB Tóraǵasy Naýryzbaı qajy Taǵanuly múftııat qyzmetkerleri men Almaty qalasynyń ımamdaryna naqty tapsyrmalar júktep, jyl basynda bekitilgen jumys josparyna sáıkes is-sharalardy joǵary deńgeıde uıymdastyrýdyń mańyzyn atap ótti.
