PAVLODARDA «DIN MEN DÁSTÚR – HALYQ QAZYNASY» RESPÝBLIKALYQ KONFERENTsIIaSY ÓTTI (FOTO)
Búgin Pavlodar qalasynda Qazaqstan musylmandary dinı basqarmasynyń uıytqy bolýymen «Din men dástúr – halyq qazynasy» respýblıkalyq konferentsııasy ótti. Aıtýly jıynǵa QMDB Tóraǵasy, Bas múftı Naýryzbaı qajy Taǵanuly, Pavlodar oblysy ákiminiń orynbasary Aızada Amangeldiqyzy, QMDB Aqsaqaldar keńesiniń múshesi Jabal Erǵalıev, belgili dintanýshy Keńshilik Tyshqan, Nur-Múbarak ýnıversıtetiniń prorektory Qaırat Qurmanbaev jáne jergilikti ımamdar qatysty.
Ulttyq dástúrimizdi ulyqtaýǵa arnalǵan jıyn Quran oqýmen bastalyp, 2022 jyly Dinı basqarmanyń atqarǵan aýqymdy jumystary jaıly beınerolık kórsetildi. Alqaly otyrysta alǵash bop sóz alǵan QMDB Tóraǵasy din men dástúrdiń mánine toqtalyp, konferentsııanyń mańyzyn aıshyqtap berdi.
«Din men dástúr – qashan da bir-birimen sabaqtas uǵym. Ekeýi egiz taqyryp desek te bolǵandaı. Qazaqtyń bir dástúriniń túbin qazsań dinge kelip tireledi. Dástúrdiń ozyǵy bar, tozyǵy bar dep jatamyz. Biraq salt-dástúr – este joq eski zamannan kele jatqan babalardan qalǵan baǵzy jol. «Ýyqty basqur saqtaıdy, ultty dástúr saqtaıdy» deıdi dana halqymyz. Qazaq halqynyń salt-dástúrleri men ádep-ǵuryptary halyqtyń turmysyna, tárbıesi men minezine, senimine qaraı qalyptasty. Búgingi tańdaǵy basty másele – halyqtyń asyl qazynasyn jastardyń boıyna sińire bilý, rýhanı baılyǵynan sýsyndatý, salt-dástúrin, tilin, dinin, dilin úıretý, boıyna darytý» deı kele Naýryzbaı qajy Taǵanuly múftııattyń osy baǵyttaǵy jumystaryna da toqtalyp ótti.
«Bul rette Qazaqstan musylmandary dinı basqarmasy jumysyn jeti baǵytqa bóldi. Sol jeti baǵyttyń biri de biregeıi – din men dástúr baǵyty. Endigi maqsat – asyl dinimiz Islam men babalar ustanǵan salt-dástúrlerimizdi halyqqa keńinen nasıhattaý, din men dástúrdiń sabaqtastyǵyn keler urpaqqa jetkizý, dástúrdi dáripteý arqyly jat aǵymnyń arbaýyna ilikken jastardy durys jolǵa baǵyttaý. Dástúrdiń dindegi orny, ǵurypty dálel retinde qarastyrý, ǵuryptyń sharıǵattaǵy sharttary, ulttyq sana syndy máseleler ýaǵyz taqyryptaryna arqaý bolmaq.
Qazaq halqynyń ǵasyrlar boıy ustanyp kele jatqan dini – Islam. Al dinı dúnıetanymdyq ustanymy Islamnyń negizgi qaınar bulaǵy Quran men ardaqty Paıǵambarymyzdyń (oǵan Allanyń salaýaty men sálemi bolsyn) súnnetine negizdelgen. Endeshe, din men dástúr úndestigin saqtaý – búgingi urpaqqa júktelgen úlken mindet. Bul eki asyl qazynamyzdy qadir tutsaq, tarıhymyz ben mádenıetimizdi ulyqtaǵan, ata-babalar qaldyrǵan uly amanatty saqtaǵan bolamyz» dedi Bas múftı.
Konferentsııada sóz alǵan oblys ákiminiń orynbasary Aızada Amangeldiqyzy aımaqtaǵy din men dástúr baǵytynyń damýyna toqtalyp, jat aǵymnan saqtaný jaıly tolyq aıtyp ótti. Sonymen qatar baıandama jasaǵan memleket jáne qoǵam qaıratkeri Jabal Erǵalıev ulttyq bolmysty saqtaý, dástúrge berik bolý, qazirgi ózgeriske ushyraǵan kóne dástúrdi jańǵyrtý jaıyna erekshe toqtaldy.
QMDB Sarapshylar keńesiniń múshesi Keńshilik Tyshqan Alashorda tusyndaǵy dástúrdiń dáriptelýi, Máshhúr Júsip Kópeıuly, Shákárim Qudaıberdiuly eńbekterindegi din men dástúrdi keńinen tarqata aıtty. Sondaı-aq jıynda sóz alǵan Qaırat Qurmanbaev, Sansyzbaı Qurbanuly, Aıtmuhammed Turyshov, Dýman Saıfolla qazirgi qoǵamdaǵy dástúrdiń mańyzy, ǵuryptyń máni, tarıhı sanany jańǵyrtý jaıyn basa aıtty.
