QABANBAI BATYR KESENESINDE BATYRLAR RÝHYNA QURAN BAǴYShTALDY (FOTO)

Búgin 9 mamyr – Jeńis kúnine oraı qala bas ımamy Erbolat Nuryldauly Qabanbaı batyr kesenesine baryp, batyrlar rýhyna Quran baǵyshtady.

Astana qalasyndaǵy zııaly qaýym ókilderi men qalalyq máslıhat depýtattary qosa barǵan kesene Qabanbaı batyr aýylynyń mańynda ornalasqan. Uly Otan soǵysyna qatysqan maıdangerler 80 jyl buryn fashısterge qarsy qan maıdanda janyn qıǵan bolsa, Qabanbaı batyr da osydan týra 300 jyl buryn  Otan basyna kelgen aýyr qasiret – Aqtaban shubyryndy,  Alqakól sulama kezeńinde jońǵar shapqynshylarymen janyn salyp kúresken edi. Eki kezeńdegi oqıǵa da el basyna tóngen uly qasiret. Qos dáýirdegi maıdanda janyn sala kúresken batyrlardyń maqsat-múddesi bir edi. Árıne, týǵan jer úshin, keleshek urpaqtyń beıbit ómir súrýi úshin shaıqasqan batyrlardy qurmetteý – bizdiń qasıetti boryshymyz. Fashısterge toıtarys bergen osynaý Jeńis kúninde beıbit zaman úshin Allaǵa madaq aıtyp, batyrlardy eske alý, olarǵa Quran aıattaryn baǵyshtap, halyqtyń amandyǵy úshin duǵa etý shúkirshil quldyń  amaly bolmaq.  Osynaý ıgi sharada aqsaqaldar tarıhtan syr shertip, Astana qalasy Esil aýdanynyń ákimi A.Esembaev pen Din isteri jónindegi basqarma basshysy N.Álmuhanov ta sóz sóıledi.

Источник: Aidos