Qala bas ımamy CALL ortalyq mamandarymen kezdesti

Búgin Astana qalasynyń bas ımamy Nurbek qajy Áýeshanuly Dinı aqparat berý ortalyǵy (Call ortalyq) mamandarymen kezdesti. Kezdesýde negizinen ortalyqtyń jumysy sóz boldy. Bas ımam dinı aqparat berý ortalyǵynyń jumysyn jaqsartý, dinı senim máselesinde ádeppen ári naqty jaýap berý, múftııat tarapynan shyǵatyn pátýalar, jańalyqtar, málimdemelerdi der kezinde qarap, jamaǵattyń suranysyna saı jumys isteý keregin basa aıtty.

«Bilesiz bul ortalyq kezinde QMDB Tóraǵasy, Bas múftı Naýryzbaı qajy Taǵanuly hazirettiń bastamasymen quryldy. Sizder kóp jaǵdaıda adamnyń meshitpen, dinmen alǵashqy baılanys núktesisizder. Telefondaǵy bir aýyz jyly sózińiz ne bolmasa artyq sóz adamnyń dinge degen kózqarasyn ózgertýi múmkin. Ár qońyraýǵa amanat retinde qarańyzdar. Alla Elshisiniń «Kim Allaǵa jáne aqyret kúnine ıman keltirse, jaqsy sóz aıtsyn nemese úndemesin» degen hadısin bilemiz. Bizdiń birinshi bilimimiz emes ádebimiz júrýi tıis. Aqparattyń durystyǵyn tekserip alyńyzdar. Ár jaýap adamdardyń senimine áser etedi. Ár suraqtyń astynda bireýdiń taǵdyry jatyr. Sondyqtan neke, otbasy, janaza, mıras, namaz, oraza syndy ózge de qulshylyqqa qatysty suraqtarǵa naqty kórkem túrde jaýap berińizder.

Men qyzmetke kelgende alǵa qoıǵan basty talaptarymnyń biri elorda ımamdarynyń osy astanaǵa saı statýsta bolýy. Onyń ishinde bilimi, biligi, ádebi, taǵylymy bári bar. Únemi bilim jetildirý. Fıqh, aqıda, otbasy, mıras, qulshylyq máseleleri boıynsha turaqty túrde bilimdi jańartyp otyrý kerek. Bilim toqtaǵan jerde qatelik kóbeıedi. Sosyn jıi qoıylatyn suraqtardy saralap otyrý qajet.

Taǵy bir aıtatyn dúnıe Siz jaı ǵana suraqqa jaýap berýshi operator emessiz, adamdarǵa durys jol, durys senim kórsetýshi qyzmetindesiz. Árbir durys jaýap saýaby úzilmeıtin sadaqa bolýy múmkin. Álbette Sizderdiń qyzmetterińiz kózge kóp kórine bermeıdi biraq myńdaǵan adamnyń kóńiline tynyshtyq syılap, olardyń durys sheshim qabyldaýyna sebep bolasyzdar» - dedi bas ımam.

Kezdesýde ortalyqqa jaýapty jeti ımam jumys barysyndaǵy negizgi máseleler, eskeretin jaıttarǵa toqtalyp usynystaryn jetkizdi. Onyń ishinde áıel jamaǵatynan keletin kóptegen suraqtar bar ekeni aıtyldy. Bas ımam óz kezeginde meshitterden áıel ustaz bólý jaǵyn qarastyratynyn jetkizdi. Sondaı-aq jıynda dinı aqparat berý ortalyǵyna jaýapty mamandardyń áleýmettik jaǵdaıy da sóz boldy.

Aıta keteıik 2018 jyly qurylyp aptasyna úzilissiz 7 kún jumys isteıtin ortalyqqa aıyna shamamen myńǵa jýyq suraq kelip túsedi. Onyń 400-den astamy qulshylyqqa qatysty, otbasylyq máseleler boıynsha 150, jat aǵymǵa qatysty 15, qaryz, saýda boıynsha 100 jáne ózge de taqyryppen 250-ge jýyq qońyraý soǵylady. Qońyraýdan bólek WhatsApp messendjerine de suraqtar keledi. Oǵan arnaıy maman bólingen. Suraqtyń basym bóligi otbasy, neke, qulshylyq sondaı-aq ózderin tolǵantqan jeke máseleler boıynsha da saýaldar kelip túsedi deıdi ortalyq mamandary.

Kezdesý sońynda bas ımam árkez jiti baılanysta bolyp, shynaıy túrde jaýap berip ortalyq jumysyn álde de kóterýge kúsh salý kerektigin jetkizdi.

Источник: Aisha