Qala bas ımamy qurban aıtqa daıyndyq jumystaryn pysyqtady

Astana qalasynyń bas ımamy Nurbek Áýezhanulynyń tóraǵalyǵymen Qurban aıt merekesine daıyndyqqa arnalǵan jıyn ótti.

Basqosýǵa elorda meshitteriniń qyzmetkerleri qatysyp, ulyq merekeni joǵary deńgeıde uıymdastyrý máseleleri jan-jaqty talqylandy.

Jıyn barysynda Qurban aıt namazyn ótkizý tártibi, qurban shalý rásimderin júıeli uıymdastyrý, arnaıy oryndardaǵy tazalyq pen qaýipsizdik talaptaryn saqtaý máselelerine erekshe nazar aýdaryldy. Sonymen qatar jamaǵatqa aqparattyq-túsindirý jumystaryn júrgizý, qaıyrymdylyq sharalaryn úılestirý jáne muqtaj otbasylarǵa qurban etin úlestirý baǵytyndaǵy jumystar pysyqtaldy.

Nurbek Áýezhanuly din qyzmetkerlerine mereke kúnderi jamaǵatpen mádenıetti ári saýatty jumys júrgizýdiń mańyzyn atap ótip, qurban shalý rásimderiniń sharıǵat talaptaryna saı ári uıymshyldyqpen atqarylýy qajet ekenin jetkizdi. Sondaı-aq meshitterdegi tártip pen tazalyqty saqtaý, kelýshilerge qolaıly jaǵdaı jasaý jáne dinı rásimderdiń mán-mańyzyn halyqqa keńinen túsindirý baǵytynda naqty mindetter júkteldi.

Источник: Aisha