Qanat Qydyrmın Atyraý ımamdaryna semınar ótkizdi (FOTO)

Ótken aptada QMDB «Zeket jáne qaıyrymdylyq» qorynyń dırektory Qanat Qydyrmın Atyraý oblysyna arnaıy jumys saparymen bardy.

Aldymen Qanat Qoıanbekuly ortalyq «Imanǵalı» meshitinde jergilikti jamaǵatpen kezdesti. Juma ýaǵyzyn júrgizgen ustaz Qanat Qydyrmın «Qasıetti Qurandaǵy múmınniń sıpaty» taqyrybynda ýaǵyz aıtty.

«Musylman musylmannyń baýyry. Musylman baýyryna zulymdyq etpeıdi, ony sókpeıdi. Kim bul dúnıede musylman baýyrynyń aıybyn jasyrǵan bolsa, Alla Taǵala onyń aıybyn Qııamette jasyrady» dep atap ótti ustaz Qanat Qydyrmın.

Budan keıin ortalyq meshitte qasıetti Ramazan aıynyń qurmetine qaıyrymdylyq aktsııasy ótti. «Ramazan syıy» jobasy aıasynda 50 muqtaj otbasyna qalalyq sýpermarkettiń sertıfıkattary tabystaldy. Árqaısysy 10 myń teńgelik sertıfıkat áleýmettik jaǵdaıy tómen otbasylarǵa, «Jýsan» operatsııasymen elge oralǵandarǵa berildi. Aktsııaǵa «Zeket jáne qaıyrymdylyq» qorynyń dırektory Qanat Qydyrmın arnaıy qatysyp, jınalǵan jurtshylyqty Ramazan aıymen quttyqtady.

Sondaı-aq Qanat Qoıanbekulyna oblys bas ımamy Altynbek Utyshanuly ortalyq «Imanǵalı» meshitiniń jumysyn tanystyrdy. Bas ımam qazirgi tańda ortalyq meshit janynan «amin.kz» medıastýdııasy, Qaıyrymdylyq mekemesi jumys istep jatqanyn atap ótti. Al zamanaýı qurylǵylarmen jabdyqtalǵan stýdııa jumysyn kórip shyqqan Qanat Qydyrmın medıa salasyn odan ári damytýǵa baǵyttalǵan usynystaryn bólisti. Sonymen birge, Qaıyrymdylyq mekemesiniń jumysymen tanysyp, saladaǵy birqatar ózekti máselelerge nazar aýdardy.

«Qaıyrymdylyq – óte názik sala. Qazirgi tańda muqtaj jandar óte kóp. Aýdıtorııa tym aýqymdy. Sondyqtan, aýdıtorııany tolyq qamtamasyz etýdiń tetikterin qarastyrý qajet» dep atap ótti «Zeket jáne qaıyrymdylyq» qorynyń dırektory.

Atyraý oblysyna jumys sapary aıasynda Qanat Qoıanbekuly meshit ımamdaryna semınar ótkizdi. Zeket taqyrybyna arnalǵan semınar barysynda spıker musylman qaýymy úshin bes paryzdyń biri sanalatyn zekettiń maǵynasy, ony jumsaýdyń úkimi týraly keńinen aqparat berdi.

«Ramazan aıynda muqtaj jandarǵa demeý kóbirek kórsetilýi kerek. Meshitterimiz muń-muqtajdarǵa rýhanı ári áleýmettik qoldaý kórsetetin ortalyqqa aınalýy tıis. Osy rette, qaıyrymdylyq baǵyttaǵy sharalarǵa kóbirek nazar salýǵa shaqyramyn. Zeket negizinen muqtaj jandardyń qajettiligine jumsalýy kerek» dep atap ótti «Zeket jáne qaıyrymdylyq» qorynyń dırektory Qanat Qydyrmın.

Eske sala ketelik, semınarǵa Atyraý oblysy boıynsha qala, aýdan, selolyq okrýg meshitteriniń ımamdary qatysty.

Odan bólek qor dırektory «Imanǵalı» meshitinde balalar arasynda ótken rýhanı saıysty tamashalady. Búldirshinder Allanyń 99 esimin jattaýdan synǵa tússe, olardyń bilimin meshit ustazdary sarapqa saldy. «Allanyń 99 kórkem esimi» saıysynda ozyq bilimimen kózge túsken «Sultan Beıbarys» meshitiniń shákirti Zırash Islam birinshi oryndy jeńip alsa, ekinshi orynǵa Atyraý selolyq meshitiniń shákirti Araılym Qasymqyzy laıyq dep tanyldy. Al úshinshi oryn Inder aýdandyq ortalyq meshitiniń shákirti Dáýren Salamatulyna buıyrdy.

Jeńimpazdardy «Zeket jáne qaıyrymdylyq» qorynyń dırektory Qanat Qydyrmın men Atyraý oblysynyń bas ımamy Altynbek Utyshanuly quttyqtap, syılyqtardy tabys etse, barlyq qatysýshy búldirshinge «Ramazan syıy» úlestirildi.

«Sharanyń maqsaty – balalarǵa rýhanı tárbıe berý. Balalarymyzdy izgilikke úndeý, este saqtaý qabiletterin shyńdaý» deıdi bas ımam Altynbek Utyshanuly.

Atyraý oblysyna jumys sapary barysynda Qanat Qoıanbekuly jergilikti «Atyraý» telearnasynan kún saıyn kórermenge usynylatyn «Ramazan – rýhanııat aıy» baǵdarlamasyna suhbat berdi. Suhbat barysynda sadaqa berýdiń saýaby, duǵanyń qabyl bolýy týrasynda kórermenge nasıhat aıtty.