Qaraǵandy: Rýhanı máýlit keshi ótti
Qaraǵandy qalasynda oblys bas ımamy Estaı Aıtýǵanulynyń uıytqy bolýymen rýhanı Máýlit keshi bolyp ótti.
Qaraǵandy oblysy boıynsha kúlli jamaǵatqa dastarhan jaıylǵan berekeli jıynǵa zııaly qaýym ókilderi, memlekettik qyzmetkerler, kásipkerler, aqsaqaldar, búkil ókildikke qarasty din qyzmetkerleri men qala turǵyndary qatysty.
Aldymen oblys bas ımamy rýhanı sharaǵa jınalǵan kópshilikti múbárak merekemen quttyqtap, Máýlittiń mańyzyna toqtaldy.
Belgili termeshi Dıdar Hamıev pen ımamdar máýlit jyryn jyrlap, paıǵambar ómirinen syr shertti. Jamaǵat arasynda suraq-jaýap oıyndary uıymdastyrylyp, kópshilik qaýymǵa Máýlitten sarqyt retinde QMDB tóraǵasy, Bas múftı Naýryzbaı qajy Taǵanulynyń basshylyǵymen jaryqqa shyqqan «Ihsan – rýhanı tárbıe negizi» atty kitap syıǵa úlestirildi.
Elimizge tanymal ýaǵyzshy Tilekqabyl Amangeldi paıǵambarymyzdyń (oǵan Allanyń salaýaty men sálemi bolsyn) ónegeli ómiri men eki dúnıe sardaryn jaqsy kórýdiń mańyzdylyǵy jaıynda ǵıbratqa toly ýaǵyz-nasıhat aıtty.
Budan bólek jamaǵat arasynda Umra qajylyǵyna joldama oınatylyp, musylmannyń basty qulshylyqtarynyń biri sanalatyn kishi qajylyq joldamasyn baǵy janǵan medrese shákirti qanjyǵasyna baılady.
Berekeli keshtiń qurmetine arnalǵan tosyn syılar munymen aıaqtalǵan joq. Qaraǵandy oblysyna qarasty Saryshaǵan kentinde asyl dinimizdiń órkendeýi úshin qajyrly qyzmet atqaryp, medreseniń irgetasyn qalap jatqan aımaq ımamy Maqanov Sabıt Bazarbaıuly «Isker ımam» atanyp, 500 000 teńge kóleminde arnaıy sertıfıkatty ıelendi.
Kesh sońynda bas ımam máýlit merekesine qatysyp, atsalysqan jandarǵa alǵysyn aıtyp, óz rızashylyǵyn bildirdi.
